गझल

मनी गुलाबी तुझा इशारा

क्षणात यावा असा शहारा

उरात दाटे अनेक चिंता

उगाच वाटे किती पसारा

तुझ्याविणा मी कसे जगावे

जगायलाही तुझा सहरा

अतूट राहो अशीच जोडी

असाच लाभो तुझा किनारा

भरास आली पहाट ओली

सुरात गातो उनाड वारा

हसून गाली ठराव झाला

विचार शंका नकोच थारा

मलाच पाही अथांग डोळे

हवाहवासा तुझा पहारा

भुलून गेल्या दिशा प्रवाही

अनंत वाहे सुगंध धारा

भलेबुरे ते घडून गेले

घडीभराचा न खेळ सारा