असेन मी

मृत्यू सर्वाचाच अंत

तरी भास असेन मी

देह त्यागला आत्म्याने

जगासाठी नसेन मी //१//

खळाळत्या झऱ्यामध्ये

पाणी होत वसेन मी

ओघळत्या लाटेमध्ये

आकस्मिक हसेन मी //२//

उपवनी पानेफुले

वास्तव्यास सुगंधात

प्रेम जगतास होता

श्वास मी प्रेमबंधात //३//

आकाशात भरारीत

पक्षी मीच विहरेन

रानी मयूर नाचात

पिसासम थिरकेन //४//

साहित्यिक प्रकारात

मीच राहीन उरून

होत कथा नी कविता 

शब्द वर्ण बहरून //५//

अमरत्व असे काय

त्याची होईल जाणिव

सारे सुरळीत जगी

माझी भासेल उणीव //६//