आयुष्याच्या सहवासात

आयुष्याच्या सहवासात

एक अनामिक ओढ

अन सुखदुःखाच्या

गणितातील आकडेमोड ,

एक एक दिवसाला

वेळेचाही आधार वाटे

प्रत्येक वेळ मला

विलक्षण भासे,

प्रत्येक पावलांचा इथे

पडावा ठसा

आठवणीच्या गाभाऱ्यातील

घेतलेला वसा ,

साथ नी सोबतीची

होते जेव्हा उजळणी

तीच मज भासे

माझी मौल्यवान ओवाळणी ,

रुसवे-फुगवे आणाभाका

जगण्याची चढाओढ

मनाच्या अंतरंगातील

जाळून टाकू तेढ ,

नवा दिवस

नवी ताकद

ना कुठली खंत

ना कुठला खेद ,

सुंदर अशा संधीप्रकाशाचे

होऊन जाऊ साक्षीदार

ना भय ना चिंता

झुगारून लोकनिंदेची लक्तरं ,

पाऊल वाटे वरच्या ठेचा

अन जाणिवेची फुंकर

माझी माती अन नाती

हेच माझे अलंकार,

धरणीच्या गर्भातील

आपण दोन बिजांकुर

वाट आहे पावसाची

धरणीचे उदर ,

अंतराच्या गाभाऱ्यातील

घंटानाद घूमू लागतो

त्या तिथे सहवासाचा

परिमळ दरवळू लागतो,

आयुष्याच्या संधीप्रकाशात

कुठूनसे यावे कवडसे

त्यातही मज मोहक

मोरपीस भासे ,

चार दिशांचे चार सोहळे

लख्ख न्हावे प्रकाशात

अंगणी असावी माझ्या

रातराणीची बरसात

रातराणीची बरसात !!