आला ऋतू हिरवा बरवा

आला ऋतू हिरवा बरवा ,

साज हिरवाळीचा नवा नवा || धृ. ||

वारे नवचैतन्याचे सुटले ,

सारे मृद् गंधाने, गंधित झाले |

निळ्या अंबरी, घनगर्दी दाटली,

श्यामल फडावरी ,बिजली नाचली |

आळविता पक्षी,' मल्हारा ', कोसळल्या,

अमृतधारा ss ,

आला ऋतू हिरवा बरवा ,

साज हिरवाळीचा नवा नवा ||१||

अंगे भिजली अवघी धरणी ,

हिरवी साडी नेसली तरु-वेलींनी,

शोभे चोळी रंगीत कुसुमांनी |

शुभ्र कंठहार गळा प्रपातांचे ,

बाजूबंद , मेखले सुंदर सरितांचे |

पायी तोडे दवबिंदू मोतीयांचे |

सजली ब्रह्मकन्या--विश्वसुंदरी ,

वसुंधरा ss ,

आला ऋतू हिरवा बरवा ,

साज हिरवाळीचा नवा नवा ||२||