आई

पहिल्यांदाच तुला सांगते गं मी काही 

आई तुझ्या सोशिकतेला तोड नाही !

किती करशील आमचे तू थकत का नाही ?

देव सुद्धा अचंबित होई वरुन जेव्हा तुला पाही ! 

आमच्यासाठीच तु जन्म तुझा वाहिला 

जगत असतो आम्ही तुझंच पुण्य घेऊन पाठीला !

अखंड झिजत राहीलीस आम्हांसाठी निरंतर 

काय उत्तर देऊ देवाला जेव्हा आम्ही जाऊ वर ?

तुच आमचे करत राहीलीस ,थांबलीच नाहीस कधी 

तुझी सेवा करायची आम्हाला दिलीच नाहीस संधी 

प्रत्येक बिकट प्रसंगी खंबीरपणे उभी राहीलीस 

आमच्या सुखासाठी मात्र स्वत:ची होळी केलीस !

फक्त देत राहीलीस , मागीतलं कधीच काहीच नाही 

तुझे उपकार फिटणार नाहीत ,जन्म पुढे सरत राही !

स्वामी तिन्ही जगाचा आई विना भिकारी !

आईचा आशीर्वाद नसेल तर हे जीवन आहे विकारी !