‘હું’ લખાયો છું

જીવનભર હું અનુભવ લઈ ઘડાયો છું,

છતાં સમજાયું ના, ક્યાં છેતરાયો છું ?

જગત સાથે ફક્ત છે એટલું સગપણ,

પડ્યો ખપ, એ મુજબ ત્યાં વેતરાયો છું.

ઉઠાવે દુશ્મનો હથિયાર, ક્યાં ડર છે ?

સ્વજનના બોલથી હરપળ ઘવાયો છું.

કહું પણ કઈ રીતે કે આપ છો અંગત ?

અહીં તો હું જ મારાથી પરાયો છું.

ગઝલ તો માત્ર નામ જ છે, કહું સાચું ?

શબદ થઈ કાગળે ખુદ ‘હું’ લખાયો છું.

‘પથિક’ છું ને ખબર છે માર્ગની તોયે,

હું કોઈના ઈશારે દોરવાયો છું.