એક ઇચ્છા.
એક ઇચ્છા.
1 min
6.9K
એક ઇચ્છા...
અનંત શૂન્યાવકાશમાં ખળભળ થઈ ગઈ
લાખો વિસ્ફોટોની હારમાળા થઈ ગઈ
જોતજોતામાં પંચતત્વોની સૃષ્ટિ થઈ ગઈ
અસંખ્ય ઇચ્છાઓની એ જનેતા થઈ ગઈ!
એક ઇચ્છા...
સત્યની શોધમાં રઝળપાટ થઈ ગઈ
લાખો વિચારોની આંધી થઈ ગઈ
ગુરૂઓ અને ગ્રંથોની ભરમાર થઈ ગઈ
અસંખ્ય સંપ્રદાયોની એ જનેતા થઈ ગઈ!
એક ઇચ્છા...
દૂર દૂર દેશ એના પર ચર્ચા થઈ ગઈ
લાખો કાગળો પર શાહીની નદીઓ થઈ ગઈ
વાંચીને કેટલીય આંખો ભીની થઈ ગઈ
અસંખ્ય ક્રાંતિઓની એ જનેતા થઈ ગઈ!
એક ઇચ્છા...
લોહીની નદીઓ વહેતી થઈ ગઈ
લાખો નિર્દોષોની કત્લેઆમ થઈ ગઈ
દર્દનાક ચીસો ઠરીઠામ થઈ ગઈ
અસંખ્ય ચિતાઓની એ જનેતા થઈ ગઈ!