ଟିକ୍ ଟିକ୍
ଟିକ୍ ଟିକ୍
ଜାଣେନି କେବେଠୁ ଭଙ୍ଗା ଆଲମିରାରେ ବନ୍ଦ ପଡିଥିବା ଘଡି ଟି ଟିକ୍ ଟିକ୍ କରି ଚାଲିଲାଣି
ପରସ୍ତ ପରସ୍ତ ଧୂଳି ଧୂସରିତ
ନୀରବ ନିଶ୍ଚଳ ଏକାନ୍ତରେ ବିସ୍ତୃତ
ଲମ୍ବା ରାତିଟା ପାହି ପାହି ଆସିଲାଣି
ମୋର ସ୍ଥୂଳ ଶରୀରରେ ଏକ ସୁକ୍ଷ୍ମ ଶିହରଣ ଖେଳିଲାଣି
ଜାଣେନି କେବେଠୁ ରୁସିଥିବା ଅଭିମାନଟା ଆଖି ତଳେ ଠୁଳ ଠୁଳ ହୋଇ ଉଛୁଳିଲାଣି
ଛାଲକାଏ ପବନ ପ୍ରୀତି ମିଶା ଇର୍ଷା
ମେଘର ମହ୍ଳାରେ ଅଦିନିଆ ବର୍ଷା
ଲାଗୁଛି ଋତୁ ବଦଳିଲାଣି
ମୋର ଶୁଷ୍କ ସିରା ପ୍ରଶିରା ରେ ଉଷ୍ମ ପ୍ରଶ୍ରବଣ ହୋଇ ବୋହିଲାଣି
ଜାଣେନି କେବେଠୁ ଥମିଯାଇଥିବା ଜୀବନର ଗାଡ଼ିଟା ଘିର ଘିର କରି ଗଡ଼ିଲାଣି
ପଲକରେ ପୁଲକ ଚାଲିରେ ଚଂଚଳ
ଅନ୍ତରର ଅନ୍ତରାଳେ ମୃଦୁ କୋଳାହଳ
ଶୂନ୍ୟ ଚିତ୍ରପଟରେ ପୁଣି ସ୍ବପ୍ନ ଆଙ୍କିଲିଣି
ମୋର କ୍ଲାନ୍ତ ଅଧର ଏକ ଅଦୃଶ୍ୟ ସ୍ପର୍ଶର ଲହରୀରେ କମ୍ପିଲାଣି
ଜାଣେନି କେବେଠୁ ଅସ୍ତ ଖୁସିଟା କୁଞ୍ଚିତ ଭ୍ରୂଲତାରେ ଖିଲି ଖିଲି ହସିଲାଣି
ଇଙ୍ଗିତରେ ସଂଗୀତ ଭାବ ରେ ମୂର୍ଚ୍ଛନା
ପ୍ରାଣରେ ପ୍ରଣୟ ଯେମିତି କବିର କଳ୍ପନା
ସବୁ ଶବ୍ଦ ର ପରିଭାଷା ବଦଳିଲାଣି
ମୋର ଶିଥିଳ କାୟା ଏକ ଅଦ୍ଭୁତ ମାୟା ରେ ବାନ୍ଧି ବାନ୍ଧି ଗଲାଣି
ଜାଣେନି କେବେଠୁ ବଧିର ହୃଦୟର ସ୍ପନ୍ଦନ ତୁମ ଛନ୍ଦରେ ଛନ୍ଦି ଲାଣି
ସ୍ପର୍ଶରେ ଇତସ୍ତତଃ ମହକରେ ମତୁଆଲା
ପୁରୁଣା ଅତୀତର ଫର୍ଦ ଚିରି
ତୁମ ସ୍ମୃତିରେ ଏକ ନୂଆ ଅତୀତ ଲେଖିଲିଣି
ମୋର ଅବଶ ପାଦ ତୁମର ତାଳେ ତାଳେ ଆଜି ପୁଣି ଠିକ ଠିକ ପଡ଼ିଲାଣି
ଜାଣେନି କେବେଠୁ ଭଙ୍ଗା ଆଲମିରାରେ ବନ୍ଦ ପଡିଥିବା ଘଡି ଟି ଟିକ୍ ଟିକ୍ କରି ଚାଲିଲାଣି
ମୋର ସ୍ଥୂଳ ଶରୀରରେ ଏକ ସୁକ୍ଷ୍ମ ଶିହରଣ ଖେଳିଲାଣି ।