ସ୍ୱାଧୀନତା ଓ ଅନ୍ୟାନ୍ୟ କବିତା

ସ୍ୱାଧୀନତା ଓ ଅନ୍ୟାନ୍ୟ କବିତା

ଏଇ ପତାକା ତଳେ 

ନିଗିଡି ପଡିଛି ଅନେକ ରକ୍ତ

ଏଇ ଖମ୍ବ ତଳେ ଟଳି ପଡିଛନ୍ତି

ଅସୁମାରୀ ଦେଶ ଭକ୍ତ।

ଏ ପତାକା ପଳାତକର ନୁହେଁ

ପରାଜିତର ନୁହେଁ

ଲଢେଇ ଓ ବଡେଇର

ବିଜୟ ବୈଜୟନ୍ତୀ

ଐତିହ୍ୟର ମହ ମହ ସ୍ମୃତି

ସାମ୍ୟ ମୈତ୍ରୀ ଶାନ୍ତିର ସଂଗୀତ

ଏଇ କେବଳ ପତାକାଟିଏ ନୁହଁ

ଆମ ଶିରା ପ୍ରଶିରାର

ପ୍ରବହମାନ ରକ୍ତ।

ଗଣତନ୍ତ୍ର

ଏ ପତାକା

ନମିତ ନୁହେଁ

ଅର୍ଦ୍ଧନମିତ ନୁହେଁ

ଅଥଚ ନଇଁ ପଡୁଛି

ନହକି ଯାଉଛି

ଭାଙ୍ଗି ପଡୁଛି ଖୁଂଟ

ଦଳେ ଖଟିଖିଆ 

ମେହନତି ମଣିଷ ହାତରୁ

ବାରମ୍ବାର ଏ ପତାକା

ଲୁଟି ନେଉଛନ୍ତି ଦଳେ ମୁଖାପିନ୍ଧା ଲୋକ।