ପରିଚୟ

ସମୟ ନଈର

 ପ୍ରଖର ସ୍ରୋତରେ

   ଭାସିଯାଏ ମୋର ନାଁ ।

ପବନର ସେଇ 

 ବିପରୀତ କୂଳେ

  ମୋର ସପନର ଗାଁ ।

ନିଇତି ଦେଖଇ 

 ଭାବନା ରାଇଜେ 

  ଜୀବନର ମୋ ନାଆ ।

ବିଚରଣ କରେ

 ତାହାରି କୂଳରେ 

   ଭାବି ସେ ମୋରି ସାହା ।

ଅନାବନା ସେଇ 

 ଜୀବନରେ ମୋର

   ଲେଖା ନାହିଁ ତା କଥା ।

ଆତ୍ମୀୟତା ଆଉ 

  ସନ୍ତର୍ପଣ ମୋର 

   ଗାଉଛି ତାର ଗାଥା ।

ବାଟ ଭୁଲା ମୁଁ ଯେ 

  ପଥିକଟେ ହୋଇ

   ଖୋଜେ ତାର ଠିକଣା ।

ଦିଗହରା ମୁଁ ସେ 

 ବାଇ ଚଢ଼େଇଟେ 

  ହୋଇ ଯେ ବାଟବଣା ।

ପ୍ରତୀକ୍ଷାର ଅନ୍ତ 

  ହୁଏ ନାହିଁ ଜମା 

   ବିଚଳିତ ମନଟା ।

ସାଗର କୂଳରେ 

  ଦରିଆ ପାରିରେ 

   ଭାସେ ଏ ଜୀବନଟା ।

ପାଣିରେ ପାଣିରେ 

  ଚହଲି ଯାଏ ମୁଁ 

   ଆଉ ମୋର ଛବିଟା ।

ପରିଚୟ ମୋର 

  କୋଉଠୁ ପାଇବି 

   ପଚାରେ ଏ ମନଟା ।