ଫଗୁଣର ପଇଁତରା
ଫଗୁଣର ପଇଁତରା
ଝିଲି ମିଲି ଦିଶେ ରଙ୍ଗ ବେରଙ୍ଗିଆ
ଫଗୁ ଅବିର ରୋଷଣୀ,
ରାଧାମାଧବଙ୍କ ରଙ୍ଗ ଦିଆ ନିଆ
ଆସିଲା ଏଥର ପୁଣି |
ରଙ୍ଗୋଲି ଖେଳରୁ ବଢିବ ସମ୍ପର୍କ
ହେବ ମନ ଦିଆନିଆ,
ପ୍ରେମିକ ପ୍ରେମିକା ଆସିଛି ସମୟ
ସାଜିବେ ତୋ ଶାରୀ ଶୁଆ |
ପ୍ରେମିକ ଯାଇଛି ଦୂର ରାଇଜକୁ
ପ୍ରେମିକାକୁ କଥା ଦେଇ,
ଫଗୁଣ ଆସିଲେ ଆଣିବି ସିନ୍ଦୁର
ସିନ୍ଥିରେ ଦେବି ଲଗେଇ |
ନାଲି ଜରଜର ଅଳତା ଆଣିବି
ଲଗେଇବୁ ସରୁ ପାଦେ,
ଶଙ୍ଖା ଆଣିବି ତୋ ହାତକୁ ଜାଣି ଲୋ
ଚମକିବୁ ତା ଶବଦେ |
ନାଲି ପାଟ ଶାଢ଼ୀ ହୀରା ମୋତି ଖଞ୍ଜି
ଆଣିବି ତୋପାଇଁ କିଣି,
ସୁନା ଅଳଙ୍କାରେ ସଜେଇବି ତୋତେ
ଦିଶିବୁ ଲୋ ପାଟରାଣୀ |
ଫେରିଲେ ଘରକୁ କଥା ପକେଇବି
ବ୍ରାହ୍ମଣ ପଢିବ ମନ୍ତ୍ର,
ଅଗ୍ନି ସାକ୍ଷୀ ରଖି ଦେବି ତୋ ଗଳାରେ
ପିନ୍ଧାଇ ମଙ୍ଗଳ ସୂତ୍ର |
ଦଶ ଦିଗପାଳ ଚାହିଁ ବସିଥିବେ
କାଟିବା ଲୋ ସାତଫେରା,
ମୁଁ ହେବି ବର ତୁ ହେବୁ କନିଆଁ
ଦେଖିବ ଦୁନିଆଁ ସାରା |
ସ୍ୱାମୀ ସ୍ତ୍ରୀ ନାମେ ପରିଚିତ ହେବା
ଗଢିବା ନୁଆଁ ସଂସାର,
ଏଇତ ଫଗୁଣ ଆସିଲା ଏଥର
ହେବ ଆମ ବାହାଘର |