ନାରଙ୍ଗୀ ପୃଥିବୀ

ପୃଥିବୀ ଆମରି କମଳା ଲେମ୍ବୁ ପରି ଘର

ଯା ଭିତରେ ମଣିଷ ଜାତି ବଞ୍ଚେ ନିରନ୍ତର ll

କମଳା ରଙ୍ଗ ମନେ ଭରେ ତ୍ୟାଗର ଭାବ

ଶାଶ୍ୱତ ଆଉ ପବିତ୍ରତା ମହକେ ସଦ୍ଭାବ ll

ଇନ୍ଦ୍ରଧନୁର ସପ୍ତ ରଙ୍ଗରୁ କମଳାଟି ନିଆରା

ବଢ଼ାଇ ଦିଏ ବିଶ୍ୱଜନଙ୍କୁ ଦିବ୍ୟାଂଶ ସାହାରା ll

ଅସ୍ତଗାମୀ ସୂର୍ଯ୍ୟଙ୍କ ଆଭାରେ ଥାଏ କମଳା

ଲକ୍ଷ୍ମୀ ଠାକୁରାଣୀଙ୍କ ନାମାନ୍ତର ରୂପ କମଳା ll

ଭାବୁକ କବି ମନେ ଭରିଦିଏ ଯିଏ ସୃଜନ କଳା

ଆଉ କେହି ନୁହେଁ ସେତ ଅଟଇ ରଙ୍ଗ କମଳା ll

ଶିଶୁ ମସ୍ତିଷ୍କରେ ଭରେ ରଂଗୀନ ଭାବନା ସେ

ମାତୃ ବକ୍ଷଜ ଢଙ୍କା କମଳା କାଞ୍ଚୁଲି ପରଶେ ll

ଉତ୍ସାହୀ ଯୁବକ ଯୁବତୀଙ୍କ ପ୍ରିୟ ରଙ୍ଗ ସେ ତ

ପରିଧାନେ ଭୂଷଣେ ପ୍ରମାଣେ ସେ ଅବିରତ ll

ନବ ଉନ୍ମାଦନା ନବ ଉଦ୍ଦୀପନା ଶିକ୍ତ ଚେତନା

କିଶୋର କିଶୋରୀ ଯୁବକ ଯୁବତୀଙ୍କ ସୁଭାବନା

କରଇ ଉଜ୍ଜୀବିତ ଅବିରାମ ଗତିରେ ଦିବା ନିଶି

ନଭାବି କଦାପି ଛୋଟ ବଡ଼ କାରେ ଗୁଣ ବରଷେ ll

ଗୋଲାପୀ ଓଠର ଗୋଲାପୀ ରଙ୍ଗର ସୁଆତପ 

ବେଣୀରେ ଖୋସି ନବ ବଧୂ କରେ ପ୍ରୀତି ଆଳାପ

ବାସର ରାତିରେ ନାଲି କୁଙ୍କୁମ ନାଲି ନଖ ରଙ୍ଗେ

ଆରକ୍ତ ନୟନ କୋଣେ ଅଳିତା ପାଦେ ସୁରଙ୍ଗେ

ତୋଷୁ ଥାଏ ସ୍ୱାମୀର ମନ ରତି କ୍ରୀଡ଼ା କରଣେ

କବରୀର ଅତର ବାସ୍ନାରେ ମହକାଇ ଘରକୋଣେ ll

କବି ଚିତ୍ତେ ଆଭୂଷଣେ ଭୂଷିତ ତରୁଣୀ ସୃଷ୍ଟି କରେ

ଗଭୀର ଉତ୍ସାହ ନିରନ୍ତର ସୃଜନୀ ବିକାଶ ମହୀରେ ll

କମଳାର ରଙ୍ଗ ଭାବୁକର ପ୍ରାଣେ ଆଙ୍କି ଚାଲେ ଛବି

ଚନ୍ଦ୍ର କିରଣେ ବାଳ ସୂର୍ଯ୍ୟ ରଙ୍ଗରେ ନିଛକ ପ୍ରତିଛବି ll

ସୃଜନୀ ସ୍ରୋତ ବୁହାଇ କମଳା ତାର ମନେ ସଦା

ଉତ୍ସାହକୁ କରେ ଉଦ୍ଦୀପିତ କାଢ଼ି ନେଇ ସବୁ ଆପଦ ll

ଶିଳ୍ପୀର ସରାଗ ତୁଳିରେ ପ୍ରକାଶେ ଘନ କମଳା ପୁଲକ

ସତେଜତା ବିକାଶ କରେ ଏଇ କମଳା ରୋମାଞ୍ଚକ ll

କମଳା ଲେମ୍ବୁ ପାଖୁଡ଼ାରୁ ଉତ୍ପତ୍ତି ଏଇ ଆମ ଜ୍ଞାନ

କମଳା ରଙ୍ଗର ତାତ୍ପର୍ଯ୍ୟ ଉପଲବ୍ଧି ଆମର ଧ୍ୟାନ ll