ବଡବଡୁଆଙ୍କୁ ଚିଠି
ବଡବଡୁଆଙ୍କୁ ଚିଠି
ମାନନୀୟ ବଡବଡୁଆ !
ଆଲୁଅରେ ଆସ
ଆଲୁଅରେ ଯାଅ ,
ଅନ୍ଧାରେ ଆସିବାକୁ
ମନ ନ ବଳାଅ ॥୧॥
ସ୍ଵାଗତ ଶୁଭେଚ୍ଛା ପାଇଁ
ଗହଳ ଅନ୍ଧାର ହଟେଇ
ଶକ୍ତି ସାଉଁଟିଛି
କରି କଳା ହରଣ ,
ନିଜେ ତ ସାଜିଛି ନୀଳକଣ୍ଠ
କରି କଳା ଧନକୁ ଆକଣ୍ଠ ପାନ ॥୨॥
ଦେଖି ଯାଅ ଥରେ
ତୁମ ନୁଆଁଣିଆ ଚାଳଟି
ଆଜି ଇନ୍ଦ୍ର ଭୁବନ ,
ଗହ ଗହ ଆଲୁଅ
ମହ ମହ ବାସନା
ହେଉ ପଛେ ଛଳ ଛନ୍ଦମୟ ମୋ ମନ ॥୩॥
ଉତ୍ତମ ଉତ୍ତର ଦାୟାଦ
ମୁଁ ମୁଁ ମୟ ଇଲାକାରେ କରିଛି ଅନେକ କିର୍ତ୍ତୀ ,
ମୁଁ ଇ ତ
ଈଶ୍ଵରୀୟ ଅସୁରୀୟ
ବାସ ବାସନାରେ ମୋହଗ୍ରସ୍ତ
ଦେବ ଦାନବର ମଧ୍ୟବର୍ତ୍ତୀ ସ୍ଥିତି ॥୪॥
ଜୀବନର ସତରଞ୍ଜି ଖେଳରେ
ତୁମ ପାଇଁ ସାପ ଶିଢି
ଏକା ଭଳି ,
ହାତଗୁଞ୍ଜା ମୋ ହାତ ବାରିସି
ଚଢୁଥାଏ ଶିଢି
ସାପ ପାରେନି ଗିଳି ॥୫॥
ହେ ପିତୃପୁରୁଷ
ଇତିହାସେ ତୁମ ଧ୍ଵଜା ଉଡେ
ବଢାଇ କଳା ସଂସ୍କୃତିର ମାନ ,
ଦେଖି ଯାଅ ଥରେ
ଉତ୍ତମ ଉତ୍ତର ପୁରୁଷ ମୁଁ
ଇଞ୍ଚେ ଇଞ୍ଚେ କରି ବିକି ଚାଲିଛି
ତୁମ ସୁନାମ ଆଉ ସମ୍ମାନ ॥୬॥
ନିର୍ମଳ କୁମାର ଦଳାଇ
ପାଇକ ସାହି,ବ୍ରହ୍ମଗିରି , ପୁରୀ
ମୋ:୯୦୯୦୦୬୯୩୫୦