ती

तिच्या स्वप्नांचा रंग

तिच्या हातावरली मेंदी

तिच्या कर्तृवाची झेप

तिच्या भाळावरली बिंदी

ती भांडेल जगाशी

भाऊ असता पाठीशी

ती पाहील जगाला

सवे घेऊनी बापाला

तिची मर्यादा मनाची

असे घराचा उंबरा

घालमेल भावनांची

व्यापी मनाचा कोपरा

तिचे हिंडणे फिरणे

हा नसे स्वैराचार

तिच्यासाठी हो मुक्तिची

आता खुली झाली दारं

तिची बहिण सावित्री

तिनी यमा धाडीयले

तिची बहिण सत्यभामा

यमसदना धाडीयले

तिला नको हो सन्मान

शाल श्रीफळ सत्कार

जर द्यायचा असेल

थोडा द्यावा हो आदर