सखा

तू बोलतोस म्हणून

आजकाल आरशात 

जरा जास्तच वेळ रेंगाळते 

केसांच्या बटा वगैरे काढून

स्वतःच स्वतःवर हसते

गजरे वगैरे लावावे वाटतात रे 

पण बाजारात जायची भिती वाटते

पायातली जोडवी

गळ्यातील मंगळसूत्र

आड येतात रे सारी 

नैतिकतेची कुंपणे 

तरीही आजकाल मी

स्वतःच्या रुपावर भलतेच प्रेम करते

तू बोलतोस म्हणून

आजकाल आरशात 

जरा जास्तच वेळ रेंगाळते

अगदी तुला हवी तशीच

दिवसभर घरभर

छानशी नटूनथटून वावरते

रेडिओवर मस्त गाणी एकते

जणु नववधु प्रिया मी लाजते 

तू बोलतोस म्हणून

आजकाल आरशात 

जरा जास्तच वेळ रेंगाळते 

लाजून एक गिरकी घेणार

इतक्यात हातावर गोंदलेली

मालकी हक्काची निषाणी

मला भानावर आणते 

मग सावरून घेते स्वतःला

आवरुन मनाचा पसारा

रटाळवान्या संसारात

तेवढाच रे तुझ्या प्रेमाचा विरंगुळा

तू बोलतोस म्हणून

आजकाल आरशात 

जरा जास्तच वेळ रेंगाळते