पाऊस असाही तसाही

विजा कडकडायला लागल्या

आताशा पावसाला सुरवात होईल

सारं कसं अगदी अंधारून आलंय

धुळीनं माखलेले रस्ते आता

नव्यानं खुलून येतील

मरगळलेली झाडं सतेज होतील

ती बघ लकाकून गेली वीज 

आता पाऊस येईल

गारा, वादळ, पडकं छत पडक्या भिंती

इतके सारे प्रश्न मनात घेऊन

कुठं साठवू या पावसाला

डोक्यावर पक्कं छप्पर घेऊन

पावसाचा आनंद घेणारी माणसं

आणि...बिना छपराची डोळ्यातल्या पाण्यानं

पावसात भर घालणारी माणसं

झोडपणारा पाऊस नागड्या देहावर घेणारी

पाहिली मी माणसं

उन्हानं खन्न वाळलेल्या भाकरीचे तुकडे

पावसात भिजवून खाताना पाहिली मी माणसं

बाकी काय......

तसा पाऊस मन भिजवून जातो

कधी कधी मन थिजवून जातो