निसर्गचित्र

उगवती भानू पाहा लाल रंग लेवूनी

भासती दाहीदिशा सौंदर्य तनू कामिनी

किरणकोवळी प्रभा विलसते नभोपरी

उजळविती भूमीला आदित्य हा चराचरी

हरितकंच शालूने भासते वधु धरा

आनंद रोज प्रसविती नवनवी वसुंधरा

ध्यानस्थ मग्न वाल्मिकी बनूनी हा उभा तरु

रम्य पुष्प खेळती कळ्यासवे वेलीवरु

विहंग विहरती नभी ठाव घेत अंतरी

शोधू पाही आसरा विसावणया वृक्षांवरी

तरंगिणी खळाळती पात्र भरुनी वाहती

शुभ्र शंख शिंपले काठावरी स्थिरावती

उंच शिखर पर्वते तटस्थ उभी राहती

विशाल या वसुंधरेचे रक्षक जणू वाटती

मधुर रस रसरसे परिपक्व या फळांतूनी

वायू खुशाल वाहती सळसळी पिकांतूनी

लावण्यवती ही धरा मिरविती सृष्टीत या

मीच एकटी इथे स्पर्धा कुणाची नच मला