कविता

सण आला दिवाळीचा

तुम्ही फराळात दंग

काम करुन शेतात

माझे भिजते सर्वांग

    लाडू करंज्या चकल्या

    गोड तुमचा फराळ

    भाळी माझ्या कामधंदा

    रोज कामाचं गुऱ्हाळं

तुम्ही दंग मैफिलित

रम्य दिवाळी पहाट

पाणी शेंदण्या पहाटे

माझ्या हातात रहाट

     नवी खरेदी तुमची

     मिळे तुम्हाला आनंद

     शेत शिवारी राबणं

     हाच जडलाय छंद !

सणा सुगीच्या दिसात

तुम्हा नटणं सजणं

माझी कष्टाची दिवाळी

शेती मातीशी झुंजणं