कुणाच्या श्रमावर कुणाची दिवाळी

कुणा रोज सांगू नभी रात काळी

कुणाच्या श्रमावर कुणाची दिवाळी

इथे भाकरीला रडे चंद्रमौळी

तिजोरीत तेथे सुखे मांदियाळी

कसा लेकरांना भरोस्यात ठेऊ

उद्या त्यास खाऊ मिळावा फराळी

धनी कुंकवाचा कुणी दूर नेला

कशी वैर झाली अमावस कपाळी

कसा दीप लाऊ उगी अंगणी ह्या

गळा फास जर का बळीचेच भाळी

सुखाशी बळीला असू दे निसर्गा

सदा सातबारा हसावा सकाळी

कुणीही नसावा भुकेने उपाशी

कुणाच्याच दारी नसो रात्र काळी