आई

मायेनं ओथंबलेली धार

मांगल्याचे सार

मातृत्वाची पुकार

जीवनाचा अमुल्य अलंकार

आई प्रेमाचं विस्तृत रान

तान्हुल्याची तहान

संस्काराची खाण

ती असते संसाराची शान

आई तृप्त आत्माची ढेकर

उघड्या भाळावरचा पदर

अनवाणी पावलांचीफुंकर             

अनाथाच्या मनीच काहुर

दुःखभरल्या हुंदक्याची वाट

सौख्याची अतुट रेशीम गाठ

संसार समृद्धीची पहाट

थंड पाण्याने भरलेला माठ

मायेचा भरगच्च हात

राबणाऱ्या बापाची साथ

तेवणाऱ्या समईची वात

दुःखावरची हुकमी मात

तीच आंब्याचा मोहोर

तीच गुलमोहोराचा बहर

तीच खरी वात्सल्य चकोर

तीच आहे न संपणार माहेर.