आई

माझ्या काळजाची तार आज छेडली

गं आई तुझी आठवण उरी दाटून आली...

दारी उभ्या प्राजक्ताने सडा घातला

तुझा मोगराही पानोपान बहरला

रातराणी पहा आपली कशी फुलली 

ग आई तुझी आठवण उरी दाटून आली...

शेत शिवार आपला पीकांनी फुलला

तुझा कडूनिंबही आंगोपांग भरला 

वा-याच्या झोक्यानं पिकं डुलू लागली

ग आई तुझी आठवण उरी दाटून आली...

उन्ह कलतीला ग आता लागले 

पक्षी घरट्याकडे सारे परतले 

वासरासाठी गाय हंबरू लागली 

ग आई तुझी आठवण उरी दाटून आली...

समोर उभा दिवाळीचा ग पाडवा 

नात्यातला संपला ग सारा गोडवा

कुणासाठी करू आता पुरणपोळी

ग आई तुझी आठवण उरी दाटून आली...

किती प्रेमानी घास तू ग मला भरविला 

बाबा माझ्या शिवाय नाही कधी जेवला

त्या प्रेमाला पारखी मी ग आज झाली 

ग आई तुझी आठवण उरी दाटून आली...

गाय वासरासाठी सोडते ग पान्हा 

माझ्यासाठी परतुन येशील का ग पुन्हा

वेड्या मनाला ओढ तुझी लागली

ग आई तुझी आठवण उरी दाटून आली...