શેરને માથે સવાશેર

એક ગામ હતું. એ ગામમાં કરિયાણાની એક દુકાન હતી. દુકાનદાર લુચ્ચો હતો. તે ઓછું તોલતો અને વધારે ભાવ લેતો. ક્યારેક ગ્રાહકને હલકો માલ પણ પધરાવી દેતો. તેની દુકાને જનારા ગ્રાહકો છેતરાઈ જતા. પણ કોઈને તેનો ખ્યાલ આવતો નહીં.

દિવસ એક ગ્રાહક તેની દુકાને આવ્યો. તેણે દુકાનદારને એક કિલો ખાંડ આપવા જણાવ્યું. દુકાનદારે ખાંડ ઓછી તોલી. ગ્રાહકે આ જોયું. તેણે દુકાનદારને ફરિયાદ કરતા કયું, કેમ ભાઈ ખાંડ કેમ ઓછી તોલી ?

દુકાનદારે ગ્રાહકને ઠંડે કલેજે જવાબ, આપ્યો તમારે વધારે વજન ઊંચકવું નહીં પડે !

ગ્રાહક પણ હોશિયાર હતો. તેણે દુકાનદારને પાઠ ભણાવવાનો નિશ્ચય કર્યો. તેણે દુકાનદારને ખાંડના ઓછા પૈસા ચૂકવ્યા.

દુકાનદારે પૈસા ગણી જોયા. પૈસા ઓછા હતા. દુકાનદારે ગ્રાહકને કયું, ભાઈ તમે મને ઓછા પૈસા આપ્યા છે.

ગ્રાહકે તરત જ જવાબ આપ્યો, ભાઈ તમારે વધારે પૈસા ગણવા નહીં પડે !

ગ્રાહકનો જવાબ સાંભળી દુકાનદારને પોતાની ચાલાકી સમજાઈ. ત્યાર- પછી તેણે ગ્રાહકો સાથેે નો પોતાનો વ્યવહાર સુધારી દીધો.