અવતારનો હિસ્સો

હસ્તિ મધ્યબિંદુની અને વિસ્તાર પરિઘની પેલે પારનો 

હિસ્સો હુંયે બની ચુક્યો એક ક્ષણમાં એક અવતારનો

ભૂમિતિ ભવ ભવની અટવાણી અનંત રેખાઓની પાર 

ત્રિવિધ તાપના ત્રિકોણે કોયડો ઉકેલાયો ચોથા કોણનો

આંકડાઓ જોડી જોડીને તારણ અંતે એકજ હાથ લાગ્યું

ખુદ હું નીકળ્યો સરવાળે હિસાબ અનંત શૂન્યોના જોડનો 

  

હરિતકણની નોંધ ક્યાં લેવાઈ છે કદી વસંતના વૈભવમાં 

ને જમાનો રસ લેતો રહ્યો સદા પાનખરના પથરાવનો 

કદાચ તમે ના સમજી શકો વલણ મારી નિખલાસતાનું

તેથી જ બોજ ખેંચું છું વજન વગરની લાગણીના ભારનો 

જન્મી આસ્તિકતા અચાનક નાસ્તિક્તાની પરાકાષ્ઠાએ

ને બે શબ્દો વચ્ચે પત્તો લાગ્યો મારી અસલી તાસીરનો 

ભટકન અંતે ખેંચી લાવી ખુદના જ "પરમ" મધ્યબિંદુએ 

"પાગલ' ને પત્તો જ ન લાગ્યો ખુદની ધડ્કનના અણસારનો