શબ્દ એટલે

શબ્દ એટલે ....

ઉતંગ મોજા લઈ ઊછળતા સાગરનાં પેટાળે સૂતી

કોઈ છીપનાં ગર્ભે ઘૂસી

સ્વાતિબુંદે રોપ્યું જાણે ઝળહળતું કો' બીજ.

બીજું શું ?

શબ્દ એટલે....

ઘંટારવની ચીસ જઈને અથડાતી હો મૂર્તિને ‘ને

મૂર્તિ મજબૂર થાય આપવા મોં માંગ્યું વરદાન.

બીજું શું ?

શબ્દ એટલે 

વર્ષો પૂજયા તુલસી ક્યારે

હસતા હસતા પ્રગટે શાલિગ્રામ.

બીજું શું ?

શબ્દ એટલે

કૂંડાળું જે વિસ્તરતું વિસ્તરતું પહોંચે

છેક બ્રહ્મને દેશ !

બીજું શું ?