માણસ ઊભો કરવો છે

જાતપગેરું શોધે એવો માણસ ઊભો કરવો છે.

પડછાયાનો પીછો છોડી, ખુદનો પીછો કરવો છે.

નીકળે તો સામેવાળાની આંખોમાંથી પણ નીકળે;

આંસુ માટે મારે એવો સીધો રસ્તો કરવો છે.

એ પોતે કણસે છે અંધારાનાં કાળા કળતરથી;

જેની હેઠે અજવાળું હો, એવો દીવો કરવો છે.

કાં તો મારામાં સંકેલું, કાં તો ખુદને ઘોળી નાંખું;

ગમે એ રીતે પણ આજે, દરિયો મીઠો કરવો છે.

સુકાન તારા હાથોમાં છે, એ બાબતની ફિકર નથી;

મારે કેવળ તેં પકડેલો નક્શો સીધો કરવો છે.

એણે બંધ કર્યાં છે એ બાજુના સઘળા રસ્તાઓ.

મારે આ બાજુનો એક જ રસ્તો ખુલ્લો કરવો છે.