Exclusive FREE session on RIG VEDA for you, Register now!
Exclusive FREE session on RIG VEDA for you, Register now!

KAUSHIK KUMAR HOTA

Others


5.0  

KAUSHIK KUMAR HOTA

Others


ଧନ କଳସ

ଧନ କଳସ

2 mins 535 2 mins 535

ବୃଦ୍ଧାଶ୍ରମର ଚାରିକାନ୍ଥ ମଧ୍ୟରେ ଖୁବ ଅଣନିଶ୍ଵାସୀ ପାଲଟି ଯାଉଛନ୍ତି ବିନୋଦ ବାବୁ । ଗୁମୁରି ଗୁମୁରି କାନ୍ଦୁଛନ୍ତି ସେ । କାହାକୁ ବା ଦୋଷ ଦେବେ । ସମୟକୁ, ନା ନିଜ ଭାଗ୍ୟକୁ । ଆଶ୍ରମର ଅନ୍ତେବାସୀ ମାନେ ଯେ ଯାହାର କାମରେ ବ୍ୟସ୍ତ ଥିଲାବେଳେ ବିନୋଦବାବୁ ବଉଳଗଛ ତଳେ ବସି ବିଗତ ଦିନର ସ୍ମୃତି ଚାରଣ କରୁଛନ୍ତି ।

ଦିନଥିଲା ଯେତେବେଳେ ସେ କୃଷି ବିଭାଗର ନିର୍ଦେଶକ ଥିଲେ, ସେତେବେଳେ କେତେ ବଡ଼ ବଡ଼ ଲୋକ ତାଙ୍କୁ ମୁଣ୍ଡିଆ ମାରୁଥିଲେ । ସ୍ତ୍ରୀ ସୁମତୀ, ଓ ପୁଅ ଯଜ୍ଞଦତ୍ତ କୁ ନେଇ ତାଙ୍କର ଛୋଟିଆ ସଂସାର । କେତେ ସୁନେଲି ସ୍ବପ୍ନ ସେ ଦେଖୁଥିଲେ ପୁଅକୁ ନେଇ । ପୁଅ ଯଜ୍ଞଦତ୍ତ ଜନ୍ମ ହେବାଦିନ ଘରେ ଆନନ୍ଦର ଲହରୀ ଖେଳି ଯାଇଥିଲା । ପୁଅର ଏକୋଇଶିଆରେ ଅକୁଣ୍ଠ ଚିତ୍ତରେ ବନ୍ଧୁବାନ୍ଧବଙ୍କୁ ଭୋଜି ଭାତରେ ଆପ୍ୟାୟୀତ କରିଥିଲେ ସେ ।

ସେଦିନ ବିନୋଦବାବୁ ନିଜ ଗାଆଁ ମାଳତୀପୁର କୁ ଯାଇଥାନ୍ତି । ତାଙ୍କ ଘରକୁ ଲାଗି ବନ୍ଧୁ ରମାକାନ୍ତର ଘର । ଦାଣ୍ଡ ଅଗଣାରେ ଦେଖିଲେ ରମାକାନ୍ତ ଆଉ ତାର ପୁଅ ସଞ୍ଜୟ ପକ୍ଷାଘାତରେ ପଡ଼ିଥିବା ମାଆ ବୁଢ଼ୀର ଯତ୍ନ ନେଉଛନ୍ତି । ରମାକାନ୍ତର ସ୍ତ୍ରୀ ଶାଶୁକୁ ଖୁଆଇ ଦେଉଛନ୍ତି । ଏହା ଦେଖି ବିନୋଦ ବାବୁ ରମାକାନ୍ତ କୁ ଡାକ ପକାଇଲେ । କହିଲେ "ବୁଝିଲୁ ରମା, ତୁ ତ ମଫସଲରେ ରହି ତୋ ଜୀବନକୁ ମାଟି କରିଦେଲୁ, ତା ସହିତ ପୁଅକୁ ବି ବେକାର କରିଦେବୁ ।" ରମାକାନ୍ତ କହିଲା ଧନଠାରୁ ସଂସ୍କାର ହେଉଛି ବଡ଼ ଜିନିଷ ରେ ଭାଇ । ଗାଆଁରେ ରହିଲେ ଏ ସବୁ ସଂସ୍କାର ଶିଖିବାକୁ ହୁଏ ।" ଏହା ଶୁଣି ବିନୋଦବାବୁ ଠୋ-ଠୋ କରି ହସିଲେ । ଗର୍ବରେ ଉତଫୁଲ୍ଲିତ ହୋଇ ଏକନିଶ୍ୱାସ ରେ କହିଲେ " ତୁ ଜାଣୁ ମୋ ପୁଅକୁ ମୁଁ ହାମିଲଟନ ଇଣ୍ଟରନେସନାଲ ସ୍କୁଲରେ ପାଠ ପଢାଉଛି । ତାର ବର୍ଷକୁ ଖର୍ଚ୍ଚ ଦଶଲକ୍ଷ ଟଙ୍କା । ଟଙ୍କା ଖର୍ଚ୍ଚକଲେ ଶିକ୍ଷା ସହିତ ସଂସ୍କାର ଆପେ-ଆପେ ଆସିଯିବରେ ।" ଆହୁରି ମଧ୍ୟ କହିଲେ "ମୁଁ ଧନକଳସ ବସାଇଛିରେ । ଦେଖିବୁ ସେ କଳସ ଯେତେବେଳେ ଉଛୁଳିବ ମୋ ଘର କେମିତି ପୁରି ଉଠିବ । "

ଗଡ଼ିଗଲା ବର୍ଷ ପରେ ବର୍ଷ । ପୁଅ ଯଜ୍ଞଦତ୍ତ ଏରୋନୋଟିକ ଇଂଜିନିୟରିଂ ପାସ କଲାପରେ ଆମେରିକାରେ ଚାକିରୀ ପାଇଲା । ସେଦିନ ବିନୋଦବାବୁଙ୍କ ଖୁସି କହିଲେ ନସରେ । କିଛିଦିନପରେ ସେହି କମ୍ପାନୀର ଜଣେ ଆମେରୀକିୟ ଝିଅକୁ ବିବାହ କଲା ଯଜ୍ଞଦତ୍ତ । ନିଜ ବାହାଘର ପାଇଁ ନିମନ୍ତ୍ରଣଟିଏ ପଠାଇଦେଲା ବାପା ମାଆଙ୍କ ପାଖକୁ । ନିମନ୍ତ୍ରଣ ପାଇ ବିନୋଦବାବୁଙ୍କ ମୁଣ୍ଡରେ ବଜ୍ର ପଡିଗଲା । ଲୋକେ ଯେତେ ବୁଝାଇଲେ ବି ଅବୁଝା ମନ ତାଙ୍କର ମାନୁ ନଥାଏ । ପୁଅ ଚିନ୍ତାରେ ସୁମତୀ ପକ୍ଷାଘାତ ରୋଗରେ ଶଯ୍ୟାଶାୟୀ ହେଲେ । ବିନୋଦବାବୁ ପୁଅକୁ ଫୋନ କଲେ ବୋହୂ ଉତ୍ତର ଦେଇ କହେ ଆସନ୍ତା ସପ୍ତାହରେ ପୁଅ ଘରକୁ ଯିବେ । ଏମିତି କେତେ ସପ୍ତାହ ବିତିଗଲା ପରେ ବିନୋଦବାବୁ ଜାଣିଲେ ଯେ ସବୁସମୟରେ ସମାନ ଉତ୍ତର ଆସୁଥିବା କଥାଟି ମୋବଇଲରେ ସେଟିଂ କରାଯାଇଛି । ସେଦିନ ସ୍ତ୍ରୀ ଆରପାରିକୁ ଚାଲିଗଲା ପରେ ବିନୋଦବାବୁଙ୍କୁ ଚାରିଆଡ଼ ଅନ୍ଧାର ଦେଖାଗଲା । ସେ ନିଜର ସମସ୍ତ ସ୍ଥାବର ସମ୍ପତ୍ତିକୁ ଶତରୂପା ଵୃଦ୍ଧାଶ୍ରମ ନାମରେ ଦାନ କରିଦେଇ ତାହାରି କୋଳରେ ଆଶ୍ରୟ ନେଲେ । ସେଦିନ ବଉଳଗଛ ମୂଳେ ଏସବୁ ଚିନ୍ତା କରି ଆଖିରୁ ଲୁହ ନିଗାଡୁ ଥିଲାବେଳେ ବନ୍ଧୁ ରମାକାନ୍ତ ପୁଅ ସଞ୍ଜୟକୁ ଧରି ଆସି ପହଞ୍ଚିଲେ । ବିନୋଦବାବୁ ରମାକାନ୍ତକୁ ଭିଡିଧରି କାନ୍ଦିଉଠିଲେ । କହିଲେ" ବୁଝିଲୁ ରମା, ମୋ ଧନ କଳସ ଆଜି ଭାଙ୍ଗି ଚୁରମାର ହୋଇଯାଇଛିରେ । କିନ୍ତୁ ତୁ ତ ପରିବାର ପାଇଁ ଯେଉଁ ସଂସ୍କାର କଳସଟିଏ ବସାଇଥିଲୁ, ତାହା ଆଜି ସୁନାକଳସ ରେ ପରିଣତ ହୋଇଯାଇଛିରେ ।" ଏତିକି ବେଳକୁ ରମାକାନ୍ତ ନିଜ ଗାମୁଛା କାନିରେ ବିନୋଦବାବୁଙ୍କ ଆଖିର ଲୁହକୁ ପୋଛି ପକାଉଥିଲେ ।

-----------------

କୌଶିକ କୁମାର ହୋତା, ନବମ ଶ୍ରେଣୀ, କେରଳା ପବ୍ଲିକ ସ୍କୁଲ, ରାଇରଙ୍ଗପୁର,

ମୟୁରଭଞ୍ଜ । ଦୂରଭାଷ:-9438745662/9348809136,

Emai।:-kaushikhota05@gmai।.com


Rate this content
Log in