SWAGAT MISHRA

Others

3.9  

SWAGAT MISHRA

Others

ଭାଇ ଭଉଣୀ କହ କାହାଣୀ

ଭାଇ ଭଉଣୀ କହ କାହାଣୀ

2 mins
48


                       

ବାପାମାଆ ଛେଉଣ୍ଡ ଭାଇ, ଭଉଣୀ ଦୁହେଁ ଭାଗ୍ୟ ଓ କର୍ମକୁ ଆଦରି ପଡ଼ିରହିଥିଲେ ଭଙ୍ଗା ଚାଳିଆରେ । ଯେଉଁ ଘରେ ଦିନରେ ସୂର୍ଯ୍ୟ ଆଉ ରାତିରେ ଚନ୍ଦ୍ର ଅବାଧରେ ଆତଯାତ କରୁଥିଲେ । ସାନ ଭଉଣୀକୁ ଦୁନିଆର ସବୁ ଖୁସି ଆଣି ପାଦ ତଳେ ଅଜାଡ଼ି ଦେବା ପାଇଁ ଭାଇଟି ଦିନରାତି ଏକ କରି ଖଟୁଥାଏ । ଭଉଣୀକୁ କେବେ ବି ବାପାମାଆଙ୍କ ଅଭାବ ଜଣାଇ ଦେଇନି । ଭଉଣୀ ପାଇଁ ସେ ଜଣେ ହିଁ ବାପାମାଆ ଉଭୟଙ୍କର ଭୁମିକା ତୁଲାଉଥାଏ । ଦିନ ମଜୁରିଆ ଭାବେ ଯେତିକି ମୂଲ ଆଣେ ଦୁଇଟି ମଣିଷର ପେଟ ଚାଖଣ୍ଡକୁ ଦୁଇଓଳି, ଦୁଇମୁଠା ଖାଇବାରେ ବିଶେଷ କରି ଅସୁବିଧା ହେଉନଥାଏ ।


ସମୟକ୍ରମେ ବୟସ ବୃଦ୍ଧି ହୋଇ ଭଉଣୀଟି ବିବାହ ଯୋଗ୍ୟା ହୋଇଯିବାରୁ,ଭାଇ ଭାବୁଥାଏ ଭଲ ଘର ଆଉ ଭଲ ବରପାତ୍ରଟିଏ ଦେଖି ହାତକୁ ଦୁଇହାତ କରିଦେଲେ ନିଜର କର୍ତ୍ତବ୍ୟ ସରିଲା । ହେଲେ ଆଜିକାର ସମୟରେ ଭଲ ବରପାତ୍ରଟିଏ ମିଳିବା କାଠିକର ପାଠ । ସହଜରେ ଗରିବ ଅନାଥ ଝିଅକୁ କିଏ ବା କାହିଁକି ବାହା ହେବାକୁ ରାଜି ହେବ । ପଡିଶା ଘର ଭାଉଜ ତାଙ୍କର ଦୂର ସଂପର୍କୀୟ ଭାଇ ସହିତ ବିବାହ ପ୍ରସ୍ତାବ ପକାଇଲେ । ଶେଷରେ ସେହି ପୁଅଟି ବାହା ହେବାକୁ ରାଜି ହୋଇଗଲା, କିନ୍ତୁ ପୁଅର ବାପା ଯୌତୁକ ବାବଦକୁ ୫ଲକ୍ଷର ଟଙ୍କା ଧରିଲେ ଯାଇ ବିବାହ ପାଇଁ ଅନୁମତି ଦେବେ ତାହା ଆଗରୁ ନୁହେଁ ବୋଲି ସ୍ପଷ୍ଟ ଭାବରେ ଜଣାଇ ଦେଲେ । ଭଉଣୀକୁ ବଡ ଘର ଦେଖି ବାହା ଦେବା ଆଶାରେ ତାଙ୍କୁ ସିନା ହଁ କରିଦେଲା, ଏବେ ଏତେ ଟଙ୍କା ନେଇ ଆସିବ କେଉଁଠୁ ?


ଭଉଣୀକୁ ସାରା ଜୀବନ ଖୁସି ରଖିବା ପାଇଁ ଭାଇ ସବୁକିଛି କରିବାକୁ ପ୍ରସ୍ତୁତ ଥିଲା । ସେଥିପାଇଁ ତ ବାହାଘର ନିମନ୍ତେ ଆବଶ୍ୟକ ହେଉଥିବା ଟଙ୍କା ପାଇଁ ନିଜ ଜୀବନକୁ ବାଜି ଲଗାଇଦେଲା । ଖବରକାଗଜ ବିଜ୍ଞାପନରେ ଲେଖାଥିଲା ଯିଏ ଗୋଟିଏ କିଡନୀ ଦେବ ତାକୁ ୧୦ ଲକ୍ଷ ଟଙ୍କା ପ୍ରଦାନ କରାଯିବ । ବିଜ୍ଞାପନ ଦେଖିବା ପରେ ଆଗପଛ ବିଚାର ନକରି ଭାଇ ପହଞ୍ଚିଗଲା ଲେଖାଥିବା ଠିକଣା ସ୍ଥାନରେ । ଡାକ୍ତରଖାନାରେ ସବୁକାମ ସରିବା ପରେ ୧୦ ଲକ୍ଷ ଧରି ମନ ଖୁସିରେ ଘରକୁ ଫେରୁଥାଏ । ଭଲରେ ଭଲରେ ଭଉଣୀର ବାହାଘର ସାରି ତାକୁ ଶାଶୁଘରକୁ ଛାଡ଼ିବା ପରେ ଭାଇଟି ଏବେ ସଂପୂର୍ଣ୍ଣ ଏକା । ସେ ଜାଣିଛି ଗୋଟିଏ କିଡନୀ ଦେବାପରେ ଆଉ ଗୋଟିଏ କିଡନୀରେ ବେଶୀଦିନ ବଂଚିବା ସଂଭବ ନୁହେଁ । ଭଉଣୀର ଖୁସିପାଇଁ ଯିଏ ନିଜ ଭବିଷ୍ୟତକୁ ଜଳାଞ୍ଜଳି ଦେଇପାରେ, ତାଠାରୁ ବଡ କଥା ଆଉ କଣ ହୋଇପାରେ ? ଖଣ୍ଡିଆ ଚାଳଘରେ ରାତିରେ ଶୋଇବା ବେଳେ ଆକାଶର ତାରା ଗଣି ଗଣି ଅପେକ୍ଷା କରିଥାଏ ଜୀବନର ଶେଷ ମୂହୁର୍ତ୍ତକୁ ।



Rate this content
Log in