ତୁମେ

ତୁମେ ମୋ ଜୀବନ ତୁମେ ମୋ ସ୍ପନ୍ଦନ

ତୁମେ ଦିନ ତୁମେ ରାତି

ତୁମେ ମୋ ଶୟନ ତୁମେ ମୋ ସପନ

ତୁମେ ଶବ୍ଦ ତୁମେ ପଂକ୍ତି

ତୁମେ ମୋ ନିଶ୍ୱାସ ତୁମେ ମୋ ବିଶ୍ୱାସ

ତୁମେ ପ୍ରେମ ତୁମେ ପ୍ରୀତି

ତୁମ ମୋ ଆକାଶ ତୁମେ ମୋ ପ୍ରକାଶ

ତୁମେ ସେଜ ତୁମେ ତାତି

ତୁମେ ମୋ ପରୀକ୍ଷା ତୁମେ ମୋ ପ୍ରତୀକ୍ଷା

ତୁମେ ପ୍ରଶ୍ନ ତୁମେ ଚାବି

ତୁମେ ମୋ ଆକାଂକ୍ଷା ତୁମେ ମୋ ତିତିକ୍ଷା

ତୁମେ ତୁଳି ତୁମେ ଛବି

ତୁମେ ମୋ ଆରମ୍ଭ ତୁମେ ମୋ ଅନ୍ତିମ

ତୁମେ ଆଶା ତୁମେ ନିଶା

ତୁମେ ମୋ ଆନନ୍ଦ ତୁମେ ମୋ ଅଳିନ୍ଦ

ତୁମେ ଭାଷା ତୁମେ ଭୁଷା

ତୁମେ ମୋ ସରଗ ତୁମେ ମୋ ନରକ

ତୁମେ ତୃଷ୍ଣା ତୁମେ ତୃପ୍ତି

ତୁମେ ମୋ କରମ ତୁମେ ମୋ ଧରମ

ତୁମେ କଳା ତୁମେ କୃତି

ତୁମେ ମୋ ଭାବନା ତୁମେ ମୋ କଳ୍ପନା

ତୁମେ ମରୁ ତୁମେ ମେଘ

ତୁମେ ମୋ ଆଇନା ତୁମେ ମୋ ଅପର୍ଣ୍ଣା

ତୁମେ ଗତି ତୁମେ ବେଗ

ତୁମେ ମୋ ପୁରୁବ ତୁମେ ମୋ ପଶ୍ଚିମ

ତୁମେ ଦିଗ ତୁମେ ଦୈର୍ଘ୍ୟ

ତୁମେ ମୋ ଅକ୍ଷାଂଶ ତୁମେ ମୋ ଦ୍ରାଘିମା

ତୁମେ ଅଗ୍ନି ତୁମେ ଅର୍ଘ୍ୟ

ତୁମେ ମୋ ପ୍ରେରଣା ଶବ୍ଦର ଝରଣା

ତୁମେ ଓଠ ତଳ ଗୀତି

ତୁମ ବିନା ମୁଁ ତ ଅସମ୍ପୂର୍ଣ ପ୍ରିୟେ

ଆରମ୍ଭ ରେ ହୁଏ ଇତି