ଶରତ ଆସିଛି ମରତେ

ଶରତ ଆସିଛି   ମରତ ଭୂଇଁକୁ

    ନେଇ ରୂପର ପସରା

ନଦୀପଠା ଧାରେ କାଶତଣ୍ଡୀ ଝୁମେ 

    ହସି ଉଠେ ବସୁନ୍ଧରା l

ଉଇଁ ଆସିଲାଣି ଶାରଦୀୟ ଜହ୍ନ

  ସୁନୀଳ ଆକାଶ କୋଳେ

ଭସା ମେଘମାଳା  ଆସର ତୋଳଇ

    ଚୁନା ଚୁନା ତାରା ମେଳେ l

ସରସୀ ଜଳରେ ଢଳି ଢଳି ଝୁଲେ 

    ମଦାଳସୀ କୁମୁଦିନୀ

ଦେହେ ତା'ର ସତେ ପ୍ରୀତିର ପିୟୁଷ 

   ବୋଳେ ଚାନ୍ଦର ଚାନ୍ଦିନୀ l

ଶେଫାଳି ସୁମନ ସୁବାସ ଛୁଟାଇ 

     ଅଭିସାରେ ଆତ୍ମହରା 

ଶିଶିର ପରଶେ ଶିହରଣ ଖେଳେ

   ତା' ତନୁ ବଲ୍ଲରୀ ସାରା l

ମନ୍ଦ ମନ୍ଦ ବହେ  ଶୀତଳ ସମୀର

    ମନ ମତୁଆଲା କରେ

ପକ୍ଷୀ କାକଳୀରେ  ଦିଗନ୍ତ ମୁଖର 

    ଶରତର ସକାଳରେ l

ମା' ଆଦିଶକ୍ତି  ଆବିର୍ଭାବ ହେବେ 

    ନବଦୁର୍ଗା ରୂପ ନେଇ 

ସବୁଜ ବନାନୀ ଗାଏ ସମ୍ମୋହନୀ

    ପୁଷ୍ପାଞ୍ଜଳି ବାଢ଼ି ଦେଇ l

ଆସ ମା' ଦୁର୍ଗେ  ଅଖିଳ ଭୁବନେ 

    ଢାଳି ଶୁଭାଶିଷ ଧାରା 

ଅପସରି ଯାଉ  ସକଳ କଳୁଷ 

    ନିରାମୟ ହେଉ ଧରା ।