ଲାଇବ୍ରେରୀ
ପ୍ରୋଫାଇଲ୍
ମାଆ ଓ ମମତା
ମାଆ ଓ ମମତା
ପୁଅରେ ପୁଅ ମୋ ଗେହ୍ଲା ପୁଅ
ଯେଉଁଠି ଅଛୁ ଖୁସିରେ ରହ
ଦୁଃଖେ ଥାଇ ତୋ ମା କହୁଛି
ତୋ ଖୁସି ଶୁଣିବା ପାଇଁ ରହିଛି
ତଥାପି ତୋ ମା'ଖୁସି
ପୁଅ ମୋର ଶିକ୍ଷିତ ହୋଇଛି ।
ଲୁଚି ଲୁଚି ମୁଁ ଘର କୋଣରେ
ଦାଣ୍ଡ ଓ ବାଡ଼ି ପିଣ୍ଡା ଦୁଆରେ
ଗୁମୁରି ଆଜି ତୋ ମା' କାନ୍ଦୁଛି
କାନ୍ଦି କାନ୍ଦି ଶେଷେ ମୁଁ ହସୁଛି
ତଥାପି ତୋ ମା'ଖୁସି
ପୁଅ ମୋର ଶିକ୍ଷିତ ହୋଇଛି ।
ଦଶମାସ କାଳ ଗର୍ଭରେ ଧରି
କେତେ ଦୁଃଖ କଷ୍ଟ ସହ୍ୟ କରି
ତୋତେରେ ମୁଁ ଜନମ ଦେଇଛି
ସେଇ ଦୁଃଖ କଷ୍ଟ ମୁଁ ସହୁଛି
ତଥାପି ତୋ ମା'ଖୁସି
ପୁଆ ମୋ'ର ଶିକ୍ଷିତ ହୋଇଛି ।
କରି କେତେ ବ୍ରତ ଉପବାସ
ସହି କେତେ ଭୋକ ଓପାସ
ଛୋଟରୁ ତୋତେ ବଡ କରିଛି
ଏବେ ତୋ ମା ଓପାସେ ରହୁଛି
ତଥାପି ତୋ ମା ଖୁସି
ପୁଆ ମୋ'ର ଶିକ୍ଷିତ ହୋଇଛି ।
ତୋ ବାପା,ବୋଉ ମୁଁ ସଦା ହୋଇ
ପର ଘରେ ମୁଁ କରିକି ପାହି
ଖୁସିରେ ତୋତେ ସଦା ରଖିଛି
ଆଜି ତୋର ମା ମାଗି ଖାଉଛି
ତଥାପି ତୋ ମା ଖୁସି
ପୁଅ ମୋ'ର ଶିକ୍ଷିତ ହୋଇଛି ।
ପେଟରେ ଓଦାକାନା ମୁଁ ଦେଇ
ତୋତେ ଖୁଆଏ ପେଟ ପୁରେଇ
ଭାବିଛୁରେ ମା କିପରି ଅଛି
ଆଜି ସେ କଣ ଖାଇ ବଞ୍ଚୁଛି
ତଥାପି ତୋ ମା ଖୁସି
ପୁଅ ମୋ'ର ଶିକ୍ଷିତ ହୋଇଛି ।
ଦେଖିଲେ ଲୁହ ଆଖିରେ ତୋର
ପଣତେ ପୋଛେ ସେ ଲୁହ ଧାର
ଆଜି ଲୁହରେ ଆଖି ଭିଜୁଛି
ଚିରା ଲୁଗାରେ ଲୁହ ପୋଛୁଛି
ତଥାପି ତୋ ମା ଖୁସି
ପୁଅ ମୋ'ର ଶିକ୍ଷିତ ହୋଇଛି ।
ପିନ୍ଧାଲୁଗାକୁ ତୋ ପାଇଁ ପାରି
ଶୁଆଇ ଦିଏ କୋଳରେ ଧରି
ଫୁଙ୍ଗୁଳା ଦେହେ ରାତି ବିତିଛି
ଆଜି ତୋ ମା ଚିରା ପିନ୍ଧୁଛି
ତଥାପି ତୋ ମା ଖୁସି
ପୁଅ ମୋ'ର ଶିକ୍ଷିତ ହୋଇଛି ।
ପାଠ ପଢେଇ ହାକିମ କଲି
ଘରଦ୍ୱାର ତୁ ଗଲୁରେ ଭୁଲି
ବୁଝିଛୁ ଘର କିପରି ଅଛି
ଅଛା ଘରେ ତୋ ମା ରହୁଛି
ତଥାପି ତୋ ମା ଖୁସି
ପୁଅ ମୋ'ର ଶିକ୍ଷିତ ହୋଇଛି ।
ଶିକ୍ଷିତା ଝିଅ ବାହାତୁ ହେଲୁ
କେଇଟା ଦିନେ ପାଖକୁ ନେଲୁ
କି ଦୋଷ ମୋ'ର ବସି ଭାବୁଛି
ଭାଗ୍ୟ ଆଦରି ପଡି ରହିଛି
ତଥାପି ତୋ ମା ଖୁସି
ପୁଅ ମୋର ଶିକ୍ଷିତ ହୋଇଛି ।
ହୋଇପାରୁ ତୁ ବଡ ନିର୍ଦୟ
ଅତି କୋମଳ ମାଆ ହୃଦୟ
ଭଲରେ ରହ କଲ୍ୟାଣ କରୁଛି
ମୋର କର୍ମ ଫଳ ମୁଁ ଭୋଗୁଛି
ତଥାପି ତୋ ମା ଖୁସି
ପୁଅ ମୋ'ର ଶିକ୍ଷିତ ହୋଇଛି ।
