କବିତା (ବନ୍ଧୁତାର ମୂଲ୍ୟ )

ଦେଖିଲି ବସିଛି ବାଟରେ,

               ସମ୍ପର୍କର ବଜାର ! 

ବିକ୍ରି ହେଉଥାଏ ସମ୍ପର୍କ,

          ଚାଲେ ଖୋଲା ବେପାର ।

କେଉଁ ସମ୍ପର୍କର ମୂଲ ,

           କେତେ ମୁଁ ବୁଝିଲି ଯାଇ !

ପଚାରିଲେ ଦୋକାନୀ କୋଉଟା,

            ବାପା ମା କି ଭାଇ ?

ନେବ ତୁମେ କେଉଁ ସମ୍ପର୍କ,

             କୁହ ଦେବି ମୁଁ ଆଣି !

ମାନବିକତା, ପ୍ରେମ ଅବା,

            ନେବ ଭାଇ ଭଉଣୀ ।

କିଛି ବି ନ କହି ଭାବିଲି,

             ମନେ ଅନେକ କଥା !

ଦୋକାନୀ କହୁଛି ସମ୍ପର୍କ,

           କୁହ ନେବ କୋଉଟା ।

ଡରି ଡରି କରି କହିଲି,

             ନେବି ବନ୍ଧୁତା ମୁହିଁ !

ଆଖି ଛଳ ଛଳ ଦୋକାନୀ,

             କହେ ବନ୍ଧୁତା ନାହିଁ ।

ବନ୍ଧୁତାର ନାହିଁ ବେପାର,

              ସେତ ଅମୂଲ ମୂଲ !

ମଳିନ ହୁଏନି ସମ୍ପର୍କ,

              ଏହା ଅଟେ ନିର୍ମଳ ।

ଯେଉଁ ଦିନ ବନ୍ଧୁ ହୋଇବ,

             ବିକ୍ରି ଏଇ ସଂସାରେ !

ଉଜୁଡିଯିବ ଏ ଦୁନିଆଁ,

            ଜାଣ ସେହି ଦିନରେ ।

ବନ୍ଧୁତା କରିଣ ବନ୍ଧୁକୁ,

             ଯିଏ କପଟ କରେ !

ଦୂରେଇ ରହିବ ତାହାଠୁ,

          ଥାଉ ଯେତେ ପାଖରେ ।।