ଜେଜେ ତମେ ବି

ଜେଜେଙ୍କର ନାତି ନାତୁଣୀ ଭିତରେ

ମୁହିଁ ଅଟେ ସବା ସାନ,

ଜେଜେ ମୋର ଭାରି ମଜାଳିଆ ଲୋକ

ବୁଝନ୍ତି ମୋହର ମନ l

ବୟସ ମୋହର ଏକୋଇଶି ପୁରି

ହୋଇଲା ପରା ବାଇଶି,

ଜେଜେ କହୁଛନ୍ତି ବୋହୂ ଟେ ଆଣିବା

ଖାଇବା ଦବସେ ପରସି l

ମୁହିଁ ମନା କଲି ମୁଣ୍ଡକୁ ଆଉଁସି

ପାଖରେ ତାଙ୍କର ବସି,

ବାହାଘର ମୋର କର ନାହିଁ ଜେଜେ

ମୁଁ ଏମିତି ରହିଛି ଖୁସି l

ଜେଜେ ମୋ କହିଲେ ଜାଣିନାହୁଁ କିଛି

ପୀରତିରେ ଥରେ ପଡ଼,

ପୀରତିରେ ଥରେ ପଡ଼ିଗଲେ ନାତି

ମାନିବୁନି ବନ୍ଧ ବାଡ଼ l

ତୋ ପାଇଁ ଗୋଟେ ସୁନ୍ଦରୀ ଝିଅଟେ

ଦେଖିକି ଆସିଛି ଆଜି,

ତାର ସଙ୍ଗେ ତୋର ବାହାଘର ହବ

ହୋଇଯାଆ ଥରେ ରାଜି l

ଦେଖିବାକୁ ସିଏ କାଚ ମାର୍କା ପରି

ଦେହରୁ ଝରୁଛି ମହୁ,

ଥରେ ଖାଲି ତୁହିଁ ରାଜି ହୋଇଗଲେ

କରିବି ତାକୁ ମୁଁ ବୋହୂ l

ଜେଜେ କଥା ଶୁଣି କହିଦେଲି ତାଙ୍କୁ 

ତମେ ବି ନା ଦୁଷ୍ଟ ଜେଜେ,

ରାଜି ହେବି ବୋଲି କହୁଅଛ ଖାଲି

ସବୁକଥା ଗୁଡା ବାଜେ l