ଗାନ୍ଧୀଙ୍କ ରାମରାଜ୍ୟ

କିଏ କହୁଛି ଗାନ୍ଧୀ ବଞ୍ଚି ନାହାନ୍ତି

ଆମରି ଭିତରେ 

ଗାନ୍ଧୀ ଅନେକ ଜୀବିତ

ନଚେତ୍ ଅସତ୍ୟ ସୀମା ଲଙ୍ଘି 

ହିଂସା ବାଡ଼ ଭାଙ୍ଗି

କାହିଁ କେତେ ଦୂର ମାଡି ଚାଲନ୍ତା

ତାକୁ ତ କିଏ ଅବରୋଧ କରୁଛି

ଗାନ୍ଧୀ ନ ହୋଇ ପାରେ,

ଗାନ୍ଧୀପଣିଆ ତ ବଞ୍ଚିଛି।

କିଏ କହେ,

ଅହିଂସା ନିଃଶେଷ ହେଲାଣି

ମୁଁ ତ କହିବି ଅହିଂସା 

ହିଂସାର ପାଉଁଶ ମଧ୍ୟରେ

ଏବେ ବି କୁହୁଳୁଛି

ଖାଲି ସିଏ ଟିକେ ରାସ୍ତା ଚାହୁଁଛି,

ନଚେତ୍ କେବେ ଠାରୁ

ଲିଭି ଯାଆନ୍ତା।

କିଏ କହେ,

ଗାନ୍ଧୀଙ୍କ ରାମ ରାଜ୍ୟ ସ୍ୱପ୍ନ 

ମୁଁ ତ କହିବି 

ରାମ ରାଜ୍ୟ ପ୍ରତିଷ୍ଠା ହୋଇସାରିଛି,

କେବଳ ରାବଣଙ୍କ ପତିଆରା

ଅହେତୁକ ବଢ଼ିଯାଇଛି,

ତଥାପି ଜଣେ ରାମର

ଆବଶ୍ୟକତା ରହିଛି,

ଲଙ୍କା ବଡ଼ ହେଲେ ଚଳିବ,

ରାମ କିନ୍ତୁ ଜଣେ ଦରକାର

ନଚେତ୍ ପ୍ରତିଷ୍ଠିତ ରାମରାଜ୍ୟ

ରାବଣ ରାଜ୍ୟ ଲଭିବ।