रिमझिम पाऊसधारा..

धरणीवर या साऱ्या,वाहे मंजुळ वारा..

आल्या हो आल्या रिमझिम पाऊसधारा..|| धृ ||

हिरवळ सजली डोंगरमाथी,

किलबिल पाखरांचं मंजुळ गान..

सजले माणिक सृष्टीवरती,

आहे सौंदर्याची खाण..||

पारिजातकांचा भव्य सडा,

रम्य पहाटे शिंपडला..

सुगंध अंतरी साठवुनी,

रंग सोहळा अनुभवला..||

भरा हो भरा, रंगपुष्पांनी ओंजळ भरा..

आल्या हो आल्या, रिमझिम पाऊसधारा..||१||

मेघातून पडले अलवार,

टपोरे मोती पाण्याचे..

सजले वेलींच्या पानावर,

घेता रूप दवबिंदूचे..||

शोभे डोईवरती,

इंद्रधनू ते सप्तरंगी..

शाल जणू पांघरली,

सृष्टीने रंगीबेरंगी..||

चिंब न्हाऊनी सजली हो, सजली वसुंधरा..

आल्या हो आल्या, रिमझिम पाऊसधारा..||२||

सृष्टीवर या मेघ बरसता,

मोर आनंदात नाचे खास..

तृष्णा शमावी सर्वांची, 

लागे मना एकच आस..||

तहानलेल्या रानावर,

होता वर्षाव पावसाचा..

हसू उमटले चेहऱ्यावर,

दिवस हा बळीराजाचा..||

पाहुनी घ्या हो, बळीराजाचा आनंद सारा..

आल्या हो आल्या रिमझिम पाऊसधारा..||३||

रूप देखणं हे सृष्टीचं,

मृदगंध पावसाचा..

करून देई ओळख आम्हा,

आकाश-धरणीच्या नात्याचा..||

काय वर्णावी आता,

निसर्गसौंदर्याची किमया..

मिळते त्याच्या मिठीत जाता,

निरपेक्ष प्रेमाची छाया..||

जाणुनी घ्या हो, निसर्गाचा संदेश खरा..

आल्या हो आल्या,रिमझिम पाऊसधारा..

आल्या हो आल्या,रिमझिम पाऊसधारा..||४||