पाऊस रंग

पाऊस तुझ्या माझ्यातला

टपोरे थेंब झेलण्यातला

तुझ्या तृषार्त नजरेतला

माझा तुझ्यात भिजण्यातला

    पाऊस सरसर रानातला

    हिरव्यागार शेतातला

    मातीच्या गंधातला

    शेतकऱ्याच्या श्वासातला

पाऊस पौर्णिमेच्या रातीतला

समुद्राच्या ओढाळ गाजेतला

शुभ्र चंदेरी वाळूतला

खाऱ्या खाऱ्या वाऱ्यातला 

    पाऊस अल्लड वयातला

    मित्रांच्या छत्रीतला

    गरम दाणेदार कणसातला

    अभ्यासाच्या बुट्टीतला

पाऊस छोट्या खोपटातला

पसरलेल्या भांडयातला

ओल्या थंड चुलीतला

रिकाम्या पोटातला

     पाऊस मोठ्या शहरातला

     खड्यांच्या रस्त्यातला

      रेल्वेच्या रुळातला

      सहनशील वृत्तीतला

पाऊस रौद्र रुपातला

निसर्गाच्या क्रोधातला

फुटलेल्या धरणातला

वाहत्या निष्पाप जीवातला