नवनिर्माण

तापलेली धरणी आसुसली गारव्याला

तिचे निःश्वास उसासे गळ घालती उन्हाला

उन सांगे सुर्य देवा पुरे संताप जीवाचा

मेघराजाला सांगावा द्यावा धरती मातेचा

सुर्य देवाने त्वरित दिला संदेश मेघांना

आता बरसू द्या जल तृप्त करा सकलांना

झाली सुरू बरसात, मिळे क्षणात गारवा

मृदगंध पावसाचा जागवी सुप्त भावा

बळीराजाचा आनंद , फुले मृदगंधा सवे

हिरवाई शिवाराला मज आणि काय हवे

प्रीत बहरू येईल, धुंद मने मिळताना

मृदगंध पावसाचा आसमंत व्यापताना

 जेव्हा चाहूल लागते एक नव जीवनाची

तेव्हा लालसा जागते अनावर निर्माणाची,

मृदगंध पावसाचा नवआशा जागवितो

झटकून मरगळ नव्या चैतन्यास बोलवितो