क्षण

काही क्षणांच्या आठवणी होतात,

     आनंद अन् सुख देण्यासाठी|

काही क्षणांच्या साठवणी होतात,

     कटूता, दुःख व अपमान विसरण्यासाठी|

काही क्षण मनाला स्पर्शून जातात,

     फिरून पुन्हा कधी न परतण्यासाठी|

काही क्षण फुलाप्रमाणे फुलतात,

     कोमजले तरी कायम सुगंध देऊन जाण्यासाठी|

काही क्षण मनाच्या गाभाऱ्यात रेंगाळतात,

     संधी मिळाली की, बाहेर डोकावण्यासाठी|

काही क्षण विचारांच्या जाळ्यात दडलेली असतात,

     बंधने भेदून मुक्त संचार करण्यासाठी|

काही क्षण वाळूच्या काणांसम एकत्रित येतात,

     हातात आले तरी हळूच नकळत निसटण्यासाठी|

पण एका क्षणासाठी मात्र आपण करतो जीवाचं रान,

     चातकाप्रमाणे पाहतो वाट, त्याचचं नाव "समाधान"|