പരിണാമം

രമേശന് 4 വയസ്സ് പ്രായം........

ഒരു ദിവസം രാത്രി അമ്പിളി അമ്മാവനെ കാണാൻ മുറ്റത്തേക്ക് ഇറങ്ങിയപ്പോൾ ആണ് രമേശൻ ആ കാഴ്ച കണ്ടത്........

അടുത്ത വീട്ടിലെ സുജ ആന്റിയെ ഭർത്താവ് ബിനു അങ്കിൾ തലങ്ങും വിലങ്ങും അടിക്കുന്നു. കരഞ്ഞു കൊണ്ട് പുറത്തേക്ക് ഓടിയ സുജ ആന്റി മുറ്റത്തേക്ക് വീണു. ബിനു അങ്കിൾ വലിയ ദേഷ്യത്തിൽ വീണു കിടക്കുന്ന സുജ ആന്റിയെ ചവിട്ടുന്നു..."നീ എന്നെ പഠിപ്പിക്കാൻ വരുന്നോടി.......മൂധേവി.... പിന്നെ കുറെ തെറി വാക്കുകളും "

ഇത് കണ്ട രമേശൻ പേടിച്ചു വിറച്ചു.... അമ്മയെ കെട്ടിപ്പിടിച്ചു.....

എന്തിനാ അമ്മേ സുജ ആന്റിയെ ചവുട്ടുന്നെ?

രമേശൻ കരഞ്ഞു കൊണ്ട് ചോദിച്ചു....

"മോൻ അങ്ങോട്ട് നോക്കണ്ട... അത് ബിനു കള്ള് കുടിച്ചിട്ടാ...."അമ്മ പറഞ്ഞു.

പിറ്റേന്ന് രാവിലെ രമേശൻ മുറ്റത്ത്‌ നിൽക്കുമ്പോൾ ബിനു അങ്കിൾ നല്ല ഡ്രസ്സ്‌ ഒക്കെ ഇട്ട് പുറത്തേക്ക് പോകുന്നു....

"വാടാ.... കുട്ടാ . മിട്ടായി മേടിച്ചു തരാം...രമേശനെ കണ്ട് ബിനു അങ്കിൾ വിളിച്ചു....."

"വേണ്ട... എനിക്ക് ബിനു അങ്കിളിനെ പേടിയാ..."

പറഞ്ഞിട്ട് രമേശൻ വീട്ടിലേക്ക് ഓടി അമ്മയെ കെട്ടിപ്പിടിച്ചു.........

കാലചക്രം മുന്നോട്ട് ഉരുണ്ടു..... രമേശന് 8 വയസ്സ് പ്രായം...

മുത്തച്ചന് മുറുക്കാൻ അടക്ക മേടിച്ചു കൊണ്ട് വരണമെന്ന് അമ്മ അച്ഛനോട് പറയുന്നത് കേട്ട് കൊണ്ടാണ് രമേശൻ എണീറ്റത്.

രമേശൻ മുത്തച്ഛന്റെ മുറിയിലേക്ക് ഓടി ചെന്നു.... മുത്തച്ഛന് അടക്ക ഇല്ലേ? രമേശൻ ചോദിച്ചു...

"നിനക്കെങ്കിലും ചോദിക്കാൻ തോന്നിയല്ലോ കുഞ്ഞേ ... എന്റെ കാര്യമൊക്കെ ഓർക്കാൻ ഇവിടെ ആർക്കാ നേരം..." മുത്തച്ഛൻ ആവലാതിപ്പെട്ടു...

രമേശന് ആകെ സങ്കടമായി... മുത്തച്ഛന് അടക്ക കിട്ടാത്തോണ്ട് വിഷമിച്ചിരിക്കുവാ... അവൻ അമ്മയോട് പറഞ്ഞു...

"നീ നിന്റെ പാട് നോക്കി പോടാ ചെറുക്കാ... കിളവന് വെറുതെ ഇരുന്ന് ഓരോന്ന് പറഞ്ഞാൽ മതിയല്ലോ..."അമ്മ ഓടിച്ചു .

പുറത്തേക്ക് ഇറങ്ങിയ രമേശൻ നോക്കിയപ്പോൾ പറമ്പിൽ ഒരു ചെറിയ അടക്കാമരം നിൽക്കുന്നു.......

അതിലാണേൽ നിറയെ പച്ച അടക്കയുമുണ്ട് 

പിന്നെ ഒന്നും നോക്കിയില്ല... രമേശൻ പറമ്പിലേക്ക് ഓടി.... അടക്കാമരത്തിൽ അള്ളിപ്പിടിച്ചു കയറി... ഊർന്ന് പോന്നെങ്കിലും വിടാതെ വീണ്ടും പിടിച്ചു കയറി..... ഒരു വിധത്തിൽ മുകളിൽ എത്തി... ഒരു അടക്കയിൽ പിടിച്ചു വലിച്ചു... കിട്ടിയില്ല... പിന്നെ ബലത്തിൽ പിടിച്ചു വലിച്ചപ്പോൾ ഒരു കുലയുമായി രമേശൻ ഊർന്ന് താഴെ വീണു.... ദേഹം മുഴുവൻ പോറിയ പാടുകൾ...വയറിൽ... നെഞ്ചിൽ ഒക്കെ ചോര കിനിയുന്നു... നല്ല വേദന.... ഇതൊക്കെ ഉണ്ടെങ്കിലും അടക്ക കിട്ടിയ സന്തോഷത്തിൽ രമേശൻ മുത്തച്ഛന്റെ അടുത്തേക്ക് ഓടി.....

"ഈശ്വരാ... ഈ ചെറുക്കൻ മരത്തിൽ വലിഞ്ഞു കയറി കുരുന്നു അടക്കയെല്ലാം പറിച്ചെടുത്തല്ലോ.... മേല് മുഴുവൻ പൊട്ടിച്ചു വന്നേക്കുന്നു..."അമ്മ ദേഷ്യപ്പെട്ടു 

കുരുന്നു അടക്കകളും പറിച്ചു കൊണ്ട് വരുന്ന രമേശനെ കണ്ട് മുത്തച്ഛൻ പൊട്ടിച്ചിരിച്ചു...... പിന്നെ കെട്ടിപ്പിടിച്ചു....തുരു തുരെ ഉമ്മ വെച്ചു......

"ഇവൻ ഉത്തരവാദിത്തമുള്ളവനാ..... വലുതാകുമ്പോൾ മിടുക്കനാകും..." മുത്തച്ഛൻ പറഞ്ഞു......

കാലചക്രം വീണ്ടും മുന്നോട്ട്....

രമേശൻ പത്താം ക്ലാസ്സിലായി... ഉപജില്ലാ സ്കൂൾ ശാസ്ത്രമേളയിൽ രമേശൻ ആണ് സ്കൂളിൽ നിന്ന് പങ്കെടുക്കുന്നത്.... രമേശൻ ഉണ്ടാക്കിയ ഓട്ടോമാറ്റിക് ട്രാഫിക് ലൈറ്റ് സിസ്റ്റം സമ്മാനർഹമായി.... സ്കൂൾ അസംബ്ലിയിൽ ഹെഡ് മാസ്റ്റർ രമേശനെ വാ തോരാതെ പ്രശംസിച്ചു.... രമേശൻ ഭാവിയിൽ വലിയ ശാസ്ത്രജ്ഞൻ ആകട്ടെയെന്നും നാടിന്റെ അഭിമാനമാകണമെന്നും ആശംസിച്ചു......

രമേശൻ പ്ലസ് ടു കഴിഞ്ഞു നിൽക്കുന്ന സമയത്താണ് മുത്തച്ഛൻ മരിക്കുന്നത്.... മരണാനന്തര ചടങ്ങുകൾക്കിടയിൽ ഓടി നടന്ന് കാര്യങ്ങൾ നടത്തുന്ന രമേശനെ എല്ലാവരും ശ്രദ്ധിച്ചു.... 

"മിടുക്കനാ...പയ്യനാണെങ്കിലും കാര്യപ്രാപ്തി ഉണ്ട്...."

"പഠിക്കാനും മിടുക്കനാ..."  തുടങ്ങിയ ബന്ധുക്കളുടെ കമന്റുകൾ തിരക്കിനും ബഹളത്തിനുമിടയിലും രമേശന്റെ അമ്മയുടെ ചെവികൾ പിടിച്ചെടുത്തു കോൾമയിർ കൊണ്ടു.

എഞ്ചിനീയറിംഗ് ഒന്നാം വർഷ വിദ്യാർത്ഥികളുടെ ഹോസ്റ്റൽ മുറി.സഹമുറിയന്മാരായ വിഷ്ണുവും ലിബിനും ഒരുമിച്ചിരുന്നു ബിയർ കഴിക്കുന്നു. രമേശനെയും കഴിക്കാൻ നിർബന്ധിച്ചെങ്കിലും രമേശൻ കഴിക്കാൻ കൂട്ടാക്കിയില്ല....ഇങ്ങനൊരു അമ്പലവാസിയെ ആണല്ലോ റൂം മേറ്റായി ലഭിച്ചത് എന്ന് പറഞ്ഞ് അവർ രമേശനെ കളിയാക്കി....

എഞ്ചിനീയറിംഗ് രണ്ടാം വർഷം........

കോളേജ് ടൂർ ദിനം.

രാത്രി ബോയ്സ് എല്ലാവരും കൂടി വെള്ളമടിക്കുന്നു. വെള്ളമടിയിൽ കേമൻ ശ്യാം ആണ്... ആൾ ഇപ്പോഴേ നല്ല ഫിറ്റ് ആണ്.

12 ആൺകുട്ടികൾ ഉള്ള ക്ലാസ്സിൽ രമേശനും ഇബ്രാഹിമും ഒഴികെ എല്ലാവരും അല്പം കഴിക്കും...

"ആണുങ്ങളായാൽ രണ്ടെണ്ണം അടിക്കണം....ഇന്ന് രാത്രി ഒരു ലാർജ് എങ്കിലും അടിക്കാത്ത എല്ലാവരും മൊണ്ണകൾ "... ശ്യാം അലറി....

രമേശനും ഇബ്രാഹിമും എല്ലാവരും കൈ അടിച്ചു.....

എന്നെ ഒഴിവാക്കണം... എനിക്ക് ഹറാം ആണ്... ഇബ്രാഹിം പറഞ്ഞു....

ശരി ഇബ്രാഹിം ഒഴിച്ച് ഇന്ന് ഒരു ലാർജെങ്കിലും അടിക്കാത്തവർ മൊണ്ണകൾ.... ശ്യാം പറഞ്ഞു....

എല്ലാവരും രമേശനെ നോക്കി..... 

രമേശൻ നിന്ന് വിയർത്തു.... കൂട്ടമായുള്ള അക്രമണമാണ്.കുടിച്ചില്ലെങ്കിൽ ടൂർ കഴിയുന്നത് വരെ.... അല്ല, കോളേജ് ജീവിതം മുഴുവൻ കളിയാക്കലുകൾ സഹിക്കേണ്ടി വരും.....

"രമേശനെ ആസ്ഥാന മൊണ്ണ ആയി പ്രഖ്യാപിക്കണം. അവന് പഠിക്കാൻ മാത്രമേ അറിയൂ.."റൂം മേറ്റ്‌ വിഷ്ണു പറഞ്ഞു 

അതെയതെ.... ലിബിൻ അടക്കിചിരിച്ചു.

ശ്യാം ഒരു ലാർജ് ഒഴിച്ചു.

രമേശൻ ഒന്നും നോക്കിയില്ല. ഒഴിച്ച് വെച്ച ഗ്ലാസ്സ് എടുത്ത് കണ്ണടച്ചു പിടിച്ചു ഒറ്റ വലിക്ക് കുടിച്ചു.....

തൊണ്ടയിൽ നിന്ന് അമാശയം വരെയുള്ള മദ്യത്തിന്റെ റൂട്ട് മാപ്പ് രമേശൻ കണ്ടു...

അമ്പരപ്പിൽ തുറന്ന വിഷ്ണുവിന്റെ വായ അടയാൻ കുറച്ച് നേരമെടുത്തു...... എല്ലാവരും കൈ അടിച്ചു.... രമേശൻ കീ ജയ്....... മുദ്രാവാക്യം മുഴങ്ങി.....

"സോഡാ പോലും ഒഴിക്കാതെ ഒരു ലാർജ് അടിച്ച രമേശനെ ഞാൻ ഗുരുവായി സ്വീകരിക്കുന്നു..."ശ്യാം തൊഴുതു 

വീണ്ടും കയ്യടി......

രമേശൻ ഹീറോ ആയി.....

"ഇവൻ പുലിയായിരുന്നു കേട്ടാ....." ലിബിൻ പറഞ്ഞു..

അഭിനന്ദന പ്രവാഹത്തിൽ മനസ്സ് നിറഞ്ഞ രമേശൻ മൂന്നെണ്ണം കൂടി അടിച്ചു....

ടൂർ കഴിഞ്ഞു വന്നതിന്റെ പിറ്റേന്ന് മുതൽ വിഷ്ണുവും ലിബിനും രമേശനും താമസിക്കുന്ന ഹോസ്റ്റൽ റൂം ബാർ പോലെ ആയി...ക്ലാസ്സിലെ മറ്റു കുട്ടികളും വരും.എന്നും ആരെങ്കിലും ഒക്കെ കുപ്പിയുമായി വരും... കുപ്പി തീരുന്നത് വരെ വെള്ളമടി.... ഇങ്ങനെ അവരുടെ കോളേജ് ജീവിതം മുന്നോട്ട്........

എഞ്ചിനീയറിങ് 4 വർഷം പൂർത്തിയായപ്പോൾ 11 സപ്ലിയുമയാണ് രമേശൻ പുറത്തിറങ്ങിയത്.

പകൽ ജോലി അന്വേഷണവും വൈകുന്നേരം വീടിനടുത്തുള്ള തെങ്ങിൻ തോപ്പിൽ കൂട്ടുകാരുമൊത്തുള്ള വെള്ളമടി.... ഇങ്ങനെ ജീവിതം വീണ്ടും മുന്നോട്ട്....

ഇതിനിടയിൽ സപ്ലി എഴുതി എടുക്കാൻ ശ്രമിച്ചെങ്കിലും പാതി വഴിയിൽ ഉപേക്ഷിച്ചു.

ചെറിയ ഒരു കമ്പനിയിൽ രമേശന് ജോലി ലഭിച്ചു.

അച്ഛന്റെ മരണശേഷം രമേശന്റെ കള്ളുകുടി കൂടിയതായി അമ്മക്ക് മനസ്സിലായി.. ഇപ്പോൾ എന്നും രാത്രി നല്ല ഫിറ്റായാണ് വീട്ടിൽ വരുന്നത്. 

ഇങ്ങനെ പോയാൽ ശെരിയാകില്ല...

രമേശനെ എത്രയും വേഗം പെണ്ണ് കെട്ടിക്കണമെന്ന് അമ്മ തീരുമാനിച്ചു.....

കുറെ നാളത്തെ പെണ്ണ് കാണൽ മാമാങ്കത്തിന് ശേഷം രമേശന് ഒരു പങ്കാളിയെ ലഭിച്ചു. 

സുധയുമായുള്ള വിവാഹശേഷവും വൈകുന്നേരത്തെ കമ്പനി കൂടൽ ഒഴിവാക്കാൻ കഴിഞ്ഞില്ല. ജോലി കഴിഞ്ഞു വന്ന് ചായകുടിയും കുളിയുമെല്ലാം കഴിഞ്ഞു ഒരു ഏഴ് മണി ആകുമ്പോഴേക്കും കൂട്ടുകാർ വിളിച്ചു തുടങ്ങും. ഉടനെ വീട്ടിൽ നിന്ന് ഇറങ്ങുന്ന രമേശൻ രാത്രി പത്ത് മണി കഴിയുമ്പോഴേക്കും വന്നു ബോധം കെട്ട് ഉറങ്ങും.

            "കൂട്ടുകാരാണ് അവനെ വഷളാക്കുന്നത്. ഇനി മോൾ വേണം അവനെ നന്നാക്കാൻ...." രമേശന്റെ അമ്മ സുധയോട് പറഞ്ഞു.

എന്നാൽ സുധയെ കേൾക്കാൻ രമേശൻ തയ്യാറായില്ല. 

"എന്തെങ്കിലും ആവശ്യം വരുമ്പോൾ ഈ കൂട്ടുകാരൊക്കെയേ കാണൂ. ഞാൻ പണിയെടുക്കുന്ന കാശിനല്ലേ കുടിക്കുന്നത്.. നിന്റെ വീട്ടിൽ നിന്ന് കൊണ്ടുവന്ന പൈസ ഒന്നുമല്ലല്ലോ "  ഇങ്ങനെയൊക്കെയാണ് രമേശന്റെ ന്യായങ്ങൾ.....

"പണിയെടുക്കുന്ന പൈസ മുഴുവൻ കുടിച്ചു കളഞ്ഞാൽ മതിയോ?....രാത്രി വന്ന് ബോധം കെട്ട് ഉറങ്ങാൻ ആണേൽ ആ തെങ്ങിൻതോപ്പിൽ കിടന്നോ....ഇനി കുടിച്ചിട്ട് വന്നാൽ ഞാൻ വീട്ടിൽ കയറ്റില്ല."സുധ ദേഷ്യപ്പെട്ടു.

രമേശൻ ഒന്നും മിണ്ടാതെ ഉറങ്ങിപ്പോയി.

അന്ന് രാത്രി തേങ്ങിൻതോപ്പിൽ വെച്ച് ശിവൻ ചേട്ടനും സുരേഷും രമേശനെ കാര്യമായി ഉപദേശിച്ചു. 

ഭാര്യമാരെ ഭരിക്കാൻ അനുവദിക്കരുത്.ആദ്യമേ നിലക്ക് നിർത്തിക്കോണം... കല്യാണം കഴിഞ്ഞ് ഒരാഴ്ച ആയപ്പോഴേക്കും അവൾ നിന്നെ ഭരിക്കാൻ തുടങ്ങിയത് കണ്ടില്ലേ.... നിന്റെ വീട്ടിൽ നിന്ന് നിന്നെ ഇറക്കി വിടാൻ ആർക്ക് പറ്റും? നീയല്ലേ അവിടെ ചിലവിനു കൊടുക്കുന്നത്... ഒരു കാരണവശാലും സുധയെ നിന്റെ തലയിൽ കയറാൻ അനുവദിക്കരുത്....

ശെരിയാണെന്ന് രമേശനും തോന്നി. എന്നെ ഇറക്കിവിടുമെന്ന് പറയാൻ അവൾ ആരാ....അതും അമ്മയുടെ മുന്നിൽ വെച്ച്...

അന്ന് രാത്രി പതിവിലും കൂടുതൽ കുടിച്ചിട്ടാണ് രമേശൻ വന്നത്.സുധ വാതിൽ തുറന്നില്ല. രമേശൻ വാതിലിൽ ശക്തിയായി ഇടിച്ചു.

"വാതിൽ തുറന്നില്ലെങ്കിൽ ഈ വീട് ഞാൻ കത്തിക്കും "പറഞ്ഞിട്ട് രമേശൻ വീണ്ടും വാതിലിൽ ഇടിച്ചു.

വാതിൽ പൊളിക്കുമെന്ന് തോന്നിയപ്പോൾ അമ്മ വന്ന് വാതിൽ തുറന്നു.

അകത്തു കയറിയ രമേശൻ സുധയെ നോക്കി... സുധ കൈ കെട്ടി നിൽപ്പാണ്....

" ഈ കോലത്തിൽ വരാൻ ആണേൽ വീട്ടിൽ കയറാൻ പറ്റില്ല.ഇങ്ങനെ ജീവിക്കാൻ ആണേൽ നാളെ എന്നെ എന്റെ വീട്ടിൽ കൊണ്ടു പോയി ആക്കിയേരെ..... " സുധ പറഞ്ഞു....

രമേശന് കലിയടക്കാനായില്ല....

"നീ എന്നെ ഭരിക്കാൻ വരുന്നോടി മൂധേവി...... നാളെ ആക്കണ്ട.... ഇപ്പോൾ തന്നെ വീട്ടിൽ കൊണ്ടുപോയി ആക്കാം......" എന്ന് പറഞ്ഞ് സുധയെ അഞ്ഞ് ചവിട്ടി..... വീണു കിടന്ന സുധയുടെ മുടിയിൽ പിടിച്ചു വലിച്ചു കൊണ്ട് വന്നു മുറ്റത്തേക്ക് എറിഞ്ഞു.........

തടയാൻ വന്ന അമ്മയെ പിടിച്ചു തള്ളി. 

വീണ്ടും സുധയുടെ നേരെ കുതിച്ചു... കലിയടങ്ങുന്നത് വരെ ചവുട്ടി.....

പിന്നെ ഇറയത്ത് കിടന്ന് ബോധം കെട്ട് ഉറങ്ങി..

വീണു കിടന്ന സുധയെ അമ്മ പിടിച്ചെഴുന്നേൽപ്പിച്ചു അകത്ത് കൊണ്ടുപോയി കിടത്തി...

പിറ്റേന്ന് രാവിലെ കുളിച്ചു റെഡി ആയി ഓഫീസിൽ പോകാൻ ഇറങ്ങിയ രമേശൻ 

അടുത്ത വീട്ടിലെ 4 വയസ്സുകാരൻ ഉണ്ണിക്കുട്ടനെ കണ്ട് അടുത്തേക്ക് വിളിച്ചു.

"അങ്കിളിന്റെ കൂടെ വാ.. ഐസ് ക്രീം മേടിച്ചു തരാം.."രമേശൻ പറഞ്ഞു 

"വേണ്ട... രമേശൻ അങ്കിളിനെ എനിക്ക് പേടിയാ.... "പറഞ്ഞിട്ട് ഉണ്ണിക്കുട്ടൻ വീട്ടിലേക്ക് ഓടി....!!