ଆପଣଙ୍କୁ ନିମ୍ନରେ ପ୍ରଦତ୍ତ କବିତାର ଭାବ ବା ବିଷୟକୁ ଗ୍ରହଣ ପୂର୍ବକ ଏକ ନୂତନ କବିତା ପ୍ରସ୍ତୁତ କରିବାକୁ ପଡ଼ିବ। ଅବଶ୍ୟ ଏହା ବାଧ୍ୟତାମୂଳକ ନୁହେଁ ଆପଣ ନିଜସ୍ୱ କବିତା ମଧ୍ୟ ଉପସ୍ଥାପିତ କରିପାରିବେ। ଏ କ୍ଷେତ୍ରରେ ଆପଣ ସ୍ଵାଧୀନ।

.............................................

ବେସୁରା ଗୀତି - ୭୦୨

ବର୍ଷା ଗୋ ତୁମେ କହି ଦିଅ ଥରେ

କାହିଁକି ଢାଳୁଛ ଏତେ ଲୁହ

ଆଖିରେ ତୁମର ଅଗ୍ନି ସ୍ଫୁଲିଙ୍ଗ

ଛାତି ତଳେ ଅସରନ୍ତି କୋହ ॥

କିଏ ସେ ତୁମକୁ ହତାଦର କଲା

କିଏ ବା କହିଲା ଟାଣ କରି

ହୃଦୟେ ତୁମର ବ୍ୟଥା ର ଲହରୀ

ଆଖିରୁ ଲୋତକ ଯାଏ ଝରି ॥

ଇନ୍ଦ୍ରଧନୁ ର ରଙ୍ଗର ରୋଷଣୀ

ପାରୁନି ତୁମକୁ ଶାନ୍ତ କରି 

ବିଜୁଳି ଯେତେବେଳେ ସ୍ମିତ ହସ ହସେ

କ୍ରୋଧେ ଶୁଭେ ତୁମ ଘଡ ଘଡି ॥

ବର୍ଷା ଗୋ ତୁମେ ପ୍ରେମିକ ପ୍ରାଣରେ

ହଜିଲା ସ୍ମୃତି କୁ ଝଲସାଅ

ଭିଜା ଭିଜା ସ୍ଵରେ ପ୍ରୀତିର ସଙ୍ଗୀତ

ନିତି ନିତି ତୁମେ ଗାଉଥାଅ ॥

ବର୍ଷା ତୁମକୁ ରହିଲା ମୋ ରାଣ

ଆଖିରୁ ଲୋତକ ଝରାଅନି

ଭଙ୍ଗା ମନ ସବୁ ଯୋଡି ଦିଅ ଆଜି

ପ୍ରୀତି ର କର ଅବାହନୀ ॥

-କବି ବିଜୟ ପୃଷ୍ଟି

.............................................