🌹ଫିକା ଫଗୁଣ🌹

ପଳାଶ ଫୁଲର ଗାଢ଼ ରଙ୍ଗ

ଛିଟାରେ

ମଲ୍ଲୀ ଫୁଲର ବାସ୍ନା

ବସନ୍ତର ମୃଦୁ ମଳୟ ଭିତରେ

ଫଗୁଣର ରଙ୍ଗ ଫିକା।।

ଫସଲ ତ କଟାଯାଉନି ଦାଉଲିରେ

ଖାଲି ଯାହା ଗୋରୁଗାଈଙ୍କ

ମୁହଁରେ

ଏ ସନ ଯେତକ ବି ଥିଲା ମଣ୍ଡିରେ

ଅଦିନିଆ ବରଷାରେ

ପଚିସଢ଼ି ଫିଙ୍ଗା ହେଲା

ବେଡ଼ି ଉପରେ କୋରଡ଼ା ମାଡ଼

ଖାଲି ଯାହା ମୁଣ୍ଡ କାନ ଆଉଁସିବାଟା

ସାର।।

ଆମ୍ବ ଗଛରେ ପୁଣି ଅଙ୍କୁରିତ ହୋଇଛି ଯୌବନ

ଅଙ୍ଗେ ଅଙ୍ଗେ ନେଶି ହୋଇଛି

ବଉଳର ପେନ୍ଥା

ଅଦିନ କୁହୁଡ଼ିକୁ କେତେବା ଭରସା।।

ବାହା ବେଦିରେ ଫୁଲ ଗଣ୍ଠି ନାହିଁ

ଦିଅଁ ମଙ୍ଗୁଳା ପାଇଁ ବନ୍ଧୁ ସାହି ଭାଇ

ତେଲିଙ୍ଗି ବାଜାର ଶବଦ

ଖାଲି ଯାହା ଶଙ୍ଖ ହୁଳହୁଳି।

ଫଗୁ ଖେଳ ନିଷେଧ

ପଟୁଆରରେ ନେତା ମନ୍ତ୍ରୀ

ଗର୍ଜନ ତର୍ଜନ ହାଲ୍କା ହୁଳିରେ

କମ୍ପୁଛି ମେଦିନୀ

ବିଚରା ସ୍ୱାସ୍ଥ୍ୟ କର୍ମୀ

ଝାଳ ନାଳ ହୋଇ ଧାଉଁଛନ୍ତି।।

ପ୍ରିୟତମାର ଓଠରୁ ଶୁଖି ଯାଇଛି

ଲାଲିମା

ନୟନର କଜ୍ଜଳ ଆଡ଼େ ସାଡ଼େ

ନେଶି ହୋଇଯାଇଛି

ଆଲୁଳାୟିତ କେଶ

କବରୀରେ ରଜନୀ ଗନ୍ଧା ବାନ୍ଧିବାରେ

ଭୀଷଣ କଟକଣା

ବିନା ଭକ୍ତରେ ରୁକୁଣା ରଥର

ଆୟୋଜନ।।