ପାଠୋଇ ବୋହୁ
ପାଠୋଇ ବୋହୁ
1 min
13.4K
ଜେଜେ ଖୋଜି ଖୋଜି ନାତିଆଟା ପାଇଁ
ଆଣିଲେ ନାତୁଣୀ ବୋହୁ ।
ଚାକିରୀ କରିକି ଟଙ୍କା ଅରଜିବ
ସେ ପରା ପାଠୋଇ ବୋହୁ ।।
ଅଜାର ସ୍ବପ୍ନରେ ସପନ ମିଶାଇ
ଖୁସି ହେଲେ ପରିବାର ।
ପାଠୋଇ ବୋହୁକୁ ପାଛୋଟି ଆଣିଲେ
ହୋଇ କେତେ ତରବର ।।
ଦୁଇ ଦିନ ଗଲା ଚାରି ମାସ ହେଲା
ପୁରିଗଲା କେତେ ବର୍ଷ ।
ଏତିକି ବର୍ଷରେ ପାଠୋଇ ବୋହୁର
କଥା ତ ଲାଗିଲା ବିଷ ।।
ସପନ ତାଙ୍କର ଅଧା ରହିଗଲା
ଫୁଟିଲାନି ମୁହେଁ ହସ ।
ଚାକିରୀଆ ପୁଅ ବୋହୁ ଚାଲିଗଲେ
ଛାଡ଼ିଦେଇ ନିଜ ବାସ ।।
ଗାଆଁ ଘରଟିର ଛପର ଉଡ଼ିଲା
ଦିନରେ ପଡୁଛି ଖରା ।
ଚାରି କାନ୍ଥ ମଧ୍ୟେ ବିଧବା ମାଆଟା
ରାତିରେ ଗଣୁଛି ତାରା ।।
ଶ୍ୱଶୁରଙ୍କ ଶ୍ରାଦ୍ଧେ ନିଜ ବର ସାଥେ
ବାଢ଼ିଲାନି ହାତେ ପିଣ୍ଡ ।
ସହରୀ ବାସ୍ନାରେ ମୋହିତ ହୋଇ ସେ
ମାଢ଼ିଲାନି ଗାଆଁ ଦାଣ୍ଡ ।।
ଦୁଃଖିନୀ ମାଆର ବିଚାରା ପୁଅଟା
ଝରାଉଛି କେତେ ଲହୁ ।
ଉଦ୍ଧତ ପତ୍ନୀକୁ କ'ଣ ବା କହିବ
ସେ ପରା ପାଠୋଇ ବୋହୁ ।।
କୁରେଶୁ ସାହୁ
ଚାନ୍ଦପୁର, ଚିକିଟି ବ୍ଲକ୍ (ଗଞ୍ଜାମ)