ଖାସି ମାଂସ ତରକାରୀ
ଖାସି ମାଂସ ତରକାରୀ
ଆଜି ମଧ୍ୟ ସ୍ବର୍ଗ ସୁଖ, ଆଳୁ ମାଂସ ଝୋଳ ମୋର
ଯିବେ ଦୟା ପଣ ହେଲେ, ଭଲଲାଗେ ମାଂସାହାର ।
ଆଜି ଛୁଟି ରବିବାର, ଯାହା ଇଛା କରିବାର
ଅଳସୁଆ ପାଗ ହେଲେ, ଖାସି ଖୋଜା ଦରକାର ।
ହାଣ୍ଡିଶାଳ ଖାଦ୍ୟସୂଚୀ, ଘରଣୀଙ୍କ ସରକାର
ସପ୍ତାହକେ ଗୋଟେ ଦିନ, କୋହଳତା ଦୟା ତା’ର ।
କଟାକଟି ବଟାବଟି, ରଖିଗଲି ଆଗଭର
ଶିଶୁପାଳ ଆଶଙ୍କାରେ, ବାହାରିଲି ତରବର ।
ଶାଗୁଣାର ବଂଶଧର, ଲାଞ୍ଜ ଦେଖି ଧରିବାର
ପାଞ୍ଚଠାଏଁ ଖୋଜି ଭଲ, ପାଇବାରେ ଧୂରନ୍ଧର ।
କେଜିଟାଏ ବନ୍ଧା ଗଲା, ପାଞ୍ଚଶହ ମୂଲ୍ୟ ତାର
ଲାଳେଇଲା ଜିଭମୋର, ତରନାହିଁ ଫେରିବାର ।
କୁକରର ସିଟିବାଜି, ଖେଳକଲା ମହକର
ଅସମୟ ଭୋକ ନାହିଁ, ପରୀକ୍ଷାଏ ଅପେକ୍ଷାର ।
ବହୁ ଦିନ ପରେ ଶାଳି, ଭାଗ୍ୟମୋର ଆତିଥ୍ୟର
ଭରିଗଲା ଆଗମନେ, ତାଙ୍କସାଥି ପରିବାର ।
ଗପଗୁଲି କଥାବାର୍ତ୍ତା, ଆମନ୍ତ୍ରଣ ଖାଇବାର
ଅବିଳମ୍ବେ ଆପ୍ୟାୟିତ, ହୋଇଗଲା ପ୍ରାପ୍ୟ ମୋର ।
ଲାଜ ଛାଡ଼ି ଆଉ ଟିକେ, ଖାଅ ଭାବି ନିଜ ଘର
ଭଉଣୀଙ୍କ ମନରଖି, ସାରିଦେଲେ ଭାର୍ଯ୍ୟାବର ।
ଯାଉଯାଉ ଦେଇଗଲେ, ଦୁଇ ପଦ ପ୍ରଶଂସାର
ଅକସ୍ମାତ ହେଲେ ମଧ୍ୟ, ସ୍ବାଦଥିଲା ଚମତ୍କାର ।
ସସମ୍ମାନ ଚର୍ଯ୍ୟାଯୋଗୁଁ, ପତ୍ନୀମୁଖ ତୃପ୍ତିକର
ଆଗ୍ରହରେ ବାଢିଦେଲେ, ଆଳୁ ଥିଲା ଭାଗ୍ୟେମୋର ।