ଦରଦି ଅକ୍ଟୋବର
ଦରଦି ଅକ୍ଟୋବର
ଜୀବନ ସମୀକରଣ ର ଦୁଇଟି ଘାତ
ଭଲ ମନ୍ଦ ନାମେ ସେ ଦୁହେଁ ଜାତ ,
ସୁଖେ ଗଡୁଥିଲା ଆମ ଜୀବନରଥ
ପାଶେ ପହଞ୍ଚିଲା ସେ "ଅନେଶ୍ୱତ "||
ଦୂର ସଞ୍ଚାର ରୁ ଡାକ ଶୁଭିଲା
ପାରାଦ୍ୱୀପ ତୀରେ ଘୂର୍ଣ୍ଣି ଖେଳିଲା ,
ତା' କୋପର ପ୍ରକୃତି ଥିଲା ଅଜଣା
ତୀବ୍ରତା ତାହାର ନେଲା ପାଉଣା ||
ତଟ ବାସିନ୍ଦାଏ ଥିଲେ ଧୂରୀଣ
ଅଣଦେଖା କଲେ ବେତାର ବାଣ,
ଛୁଟି ହେଇଥିଲା ଟ୍ୟୁସନ୍ ବେଳ
"୨୮" ସନ୍ଧ୍ୟା ର ସେ ସାଥୀ ମେଳ ||
ଆଶ୍ୱାସନା ଦେଇ କଥା ହୋଇଲି
ବାତ୍ୟା ପରେ ଦେଖାହେବ କହିଲି ,
ରାତି କଟିଥିଲା ଆଶା ଆଶଙ୍କେ
ଭୋର୍ ଗର୍ଜିଲା ବାତ୍ୟା ଆତଙ୍କେ ||
ଅନେଶ୍ୱତ ବାଆ ଘନେଇଥିଲା
"୨୬୦" ଛୁଇଁ କି ରେକର୍ଡ କଲା,
"୩୬" ଘଣ୍ଟା ର ଖେଳ ସେ ଥିଲା
"ମହାବାତ୍ୟା ସାଜି ଜୀବନ ନେଲା ||
ତରୁଲତା ସବୁ ଉପାଡ଼ି ଦେଲା
ତଟ ଜୀବନ କୁ ପୂରା ଗ୍ରାସିଲା,
ସମ୍ପର୍କ ଛିଡିଲା ପବନ ବଳେ
ଜୀବନ ହଜିଲା ଭଉଁରୀ କୋଳେ ||
କ୍ଷୀଣ କରିଦେଲା କୁଟୁମ୍ବ ଡାକ
ଶୋକେ ଛାଡି ଗଲା ଜୀବନ ଯାକ,
ଜମାଟ ବାନ୍ଧିଲା ଛାତିରେ କୋହ
ଶୁଖିଗଲା ଆଖି ନ ଝରେ ଲୁହ ||
ମୂକ ହୋଇଗଲା ମଣିଷ କାନ୍ଦ
ମୋଡ଼ି ଦେଇଥିଲା ଜୀବନ ଛନ୍ଦ,
କୁଢ଼ କୁଢ଼ ଶବ ଅଜାଡ଼ି ଦେଲା
ବିନା ମୁଖାଗ୍ନୀ ରେ ସେ ଜଳାଗଲା ||
କାଠ ନ ପାଇଲା ଶେଷ ସମୟେ
ଜୁଇ ଶୋଇ ଥିଲା ଅଜଣା ସାଥେ,
ମନେ ଅଛି ମୋର ସେ ଦୁଇ ସାଥୀ
ଯାହା ହରାଇଲି ସେଦିନ ରାତି ||
"ଦିଲ୍ଲୀପ୍","ନିବେଦିତା" ଥିଲା ତାଙ୍କ ନାମ
ଚିହ୍ନ ଛାଡି ଗଲେ ସେ ଇହଧାମ,
ସାଥୀ ତୁମ ସ୍ମୃତି ଅଛି ସାଇତି
ସଦା ଖୁସି ଥାଅ ଅଛ ଯେଉଁଠି ||
ପୂରିତ ଗଲାଣି ଉଣେଇଶ ବର୍ଷ
ଅବପାତ ନାମେ ମନରେ ଦକ,
"ଅକ୍ଟୋବର" ତୁୁୁମେ ଭାରି ଦୁର୍ଦ୍ଦାନ୍ତ
ସବୁ ବର୍ଷେ ଆସ ହୋଇ ଅଶାନ୍ତ ||
"ଫାଇଲିନ୍", "ହୁଡ୍ ହୁଡ୍" ତୁମରି ଦାନ
"ତିତ୍ଲୀ" ଆଣି ପୁଣି ଦେଲ ଆହ୍ୱାନ,
ପରବ ଆମର ଦେଉଛ ଧୋଇ
ସଭିଁଏ କାନ୍ଦନ୍ତି ତୁମକୁ ପାଇ ||
(ଅକ୍ଟୋବର) ଅଭିମାନ ଛାଡି ଆଶିଷ ଦିଅ
ଭୁଲ୍ ଯଦି ଅଛି ତା'କହି ଦିଅ,
ଗୁହାରି ତୁମକୁ ଏତିକି ମୋର
ଭବିଷ୍ୟତ ଆମ କର ବିଚାର ||
ଅସହ୍ୟ ମଣୁଛୁ ତୁମରି ଦେଖା
ଖୁସି ର ତୂଳୀ ରେ ଆଙ୍କ ବିଭୀଷିକା,
କ୍ରୋଧ ତ୍ୟାଗ କରି ଶାନ୍ତ ତ'ହୁଅ
ଜୀବନ କୁ ଆମ ଜୀବନ ଦିଅ ||