ବର୍ଣ୍ଣବୋଧ

ଓଡିଆ ଭାଷାର   ସଙ୍କଟ ସମୟେ 

  ଉଭା ହେଲେ କେତେ ରଥୀ, 

ଭାଷା ସୁରକ୍ଷାର   ଦାୟିତ୍ୱ ନେଇଣ 

  ସୃଜିଲେ ଅମର କୃତି ॥

ଗୌରୀ ନୀଳମଣି  କବି ରାଧାନାଥ 

   ମଧୁ ଫକୀରମୋହନ,

ଓଡିଆ ଭାଷାର   ସୁରକ୍ଷା ସକାଶେ 

   କରିଲେ ଜୀବନେ ପଣ ॥

 ପତ୍ରିକା ପ୍ରକାଶ   ସାହିତ୍ୟ ସାଧନା 

  କାର୍ଯ୍ୟେ ହେଲେ ସର୍ବେ ରତ,

ଜ୍ଞାନ ମଧୁ ନେଲେ  ପାଠ ପଢା ଲାଗି

  ପାଠ୍ୟ ପୁସ୍ତକ ଦାୟିତ୍ୱ ॥

 ପିଲାଏ ଓଡିଆ  ଅକ୍ଷର ଚିହ୍ନିବେ 

  ପଢିବାରେ ହେବେ କ୍ଷମ,

ସେଥିଲାଗି ମଧୁ  ପୁସ୍ତକ ଲେଖିଲେ

  ବର୍ଣ୍ଣବୋଧ ଯାର ନାମ ॥

କ୍ରମ ଅନୁବର୍ତ୍ତୀ   ସଜ୍ଜିତ ଅକ୍ଷର

  ମାତ୍ରା ଯୁକ୍ତାକ୍ଷର ଫଳା, 

ବର୍ଣ୍ଣବୋଧ ଗଢା   ବିଜ୍ଞାନ ଭିତ୍ତିରେ 

  ବିଦ୍ୟମାନ ମଧୁକଳା ॥

ବର୍ଣ୍ଣ ମାତ୍ରା ଫଳା  ଶିକ୍ଷା ସହାୟକ 

  ଅଟେ ମଧୁ ବର୍ଣ୍ଣବୋଧ, 

ବର୍ଣ୍ଣବୋଧ ପଢି   ଓଡିଆ ପିଲାଏ 

  ଲଭନ୍ତି ସାକ୍ଷର ପଦ ॥

ବର୍ଣ୍ଣବୋଧ ଅଟେ   ମହୋଷଧି ତୁଲ୍ୟ 

  ଏକ ଦିବ୍ୟଜ୍ଞାନ ଗଦ,

ଓଡିଆ ଶିକ୍ଷାର   ପ୍ରସ୍ତାବନା ସେଇ

  ଭାଷା ଶିକ୍ଷା ଆଦ୍ୟ ପାଦ ॥

ଧନ୍ୟ ଧନ୍ୟ ପୂଜ୍ୟ  ହେ ମଧୁସୂଦନ !

   ଜାତି ପ୍ରାତଃ ସ୍ମରଣୀୟ, 

ବର୍ଣ୍ଣବୋଧ ରଚି   ଭାଷା ସାଙ୍ଗେ କଲ

   ଓଡିଆ ଜାତିର ଜୟ ॥