ଅଲିଅଳି ନବବଧୂ

ମଥା ନଇଁ ଯେବେ ସୁନା ସୁରୁଜଟି

ଢଳିଯାଏ ପଶ୍ଚିମରେ

ନାଲିନାଲି ରେଣୁ ବିଞ୍ଚି ଗଗନ ରେ

ଭାବୁକ ମନକୁ ହରେ l

ବିହଙ୍ଗକାକଳି ଗୋଧନ ବୋବାଳି

ଶବ୍ଦ ଶୁଭେ ରହି ରହି

ପାଦ ଚିପି ଚିପି ସନ୍ଧ୍ୟା ନଇଁ ଆସେ

ଶର୍ବରୀ ବାରତା ନେଇ l

ହସ୍ତେ ରୁଣୁ ଝୁଣୁ ଚୁଡ଼ିର ଶବଦ

ତୁଳସୀ ଚଉଁରା ମୂଳେ

କୂଳବଧୂ ସିଏ ପ୍ରିତୀଛନ୍ଦା ଆସି

ସଞ୍ଜବତୀ ଟିଏ ଜାଳେ l

ପରଦେଶୀ କାନ୍ତ ଜଗିଛି ସୀମନ୍ତ

ନବବଧୂ ଛାଡି ଘରେ

ସଜ୍ଜଳ ନୟନେ ବୃନ୍ଦାବତୀ ପାଦେ

ମଙ୍ଗଳ କାମନା କରେ l

ପିତା ମାତା ସମ ଶାଶୁ ଶଶୁରଙ୍କ

ସେବାରେ ଲଗାଇ ମନ

କନ୍ୟାଠୁ ଅଧିକ ଆଦର ପାଇଛି

ନୁହଁ କି କୋଟିଏ ଧନ ?

ଗୃହର ସଂସ୍କାର ଜଗି ପ୍ରୀତିଛନ୍ଦା

ରଖି କୂଳବଧୂ ମାନ

ବୃଦ୍ଧ ବୃଦ୍ଧା ଶାଶୁ ଶଶୁର ଙ୍କୁ ସେବି

ହୋଇଛି ସେ କନ୍ୟା ରତ୍ନ l