विठू दाता..

मुखी विठू नाम | नाही दुजे काम |

घ्यावे मुखी नाम | येता जाता ||

उभा विटेवरी | कर कटेवरी |

घेण्या भेट हरी | वारकरी ||

सज्जनांची वाचा | भाव हा जीवाचा |

पुकारा मनाचा | दर्शनाचा ||

साजीला कपाळा | चंदनाचा टिळा | 

तुळशीची माळा | धारी गळा ||

रंगाने सावळा | स्वभावाने भोळा |

पतित आगळा | लावी लळा ||

जप तप कर्म | क्रिया नेम धर्म 

पाळीता उमगे | जीवा मर्म ||

मुखे हरी म्हणा | लाभे पुण्य त्यांना |

द्वारकेचा राणा | सांगे खुणा ||

देवाचिये द्वारी | उभा क्षणभरी |

वैकुंठ पंढरी | भासे सारी ||

कापुराच्या वाती | उजळल्या ज्योती |

विठू ठायी भक्ती | मिळे प्राप्ती ||

अर्पिले जीवन | माऊली चरणी |

रूप ते पाहुनी | भाळे मनी ||

नाही मनी चिंता | मिटली ती भ्रांता |

पाजे विठू दाता | रसामृता ||

विनवी स्वप्नील | जनास सकल | 

भक्तिविण मुक्ती | ना लाभेल ||