झाडाची शिकवण

निसर्गाची किमया

आज मी पाहिली

आणि माणूस म्हणून

मलाच माझी लाज वाटली

बहरलेला आम्रवृक्ष

क्षणात त्याने तोडला

फळाचा आणि कोवळ्या पालवीचा

विचारच नाही केला

स्वार्थासाठी तोडून

अर्ध्यावरच तसाच सोडून दिला

सजीव झाड निर्जीव होऊन

तसाच खितपत पडला

अर्धवट उन्मळून पडलेल्या झाडाने

कमालच केली

लागलेल्या फळातून

रोपटं होऊन जिद्द नाही सोडली

कुठूनही कसंही बहरावं

ते निसर्गाकडून शिकावं

आता तरी आपल्या चुका सुधारून

माणसाने माणसासारखं वागावं