आत्मचिंतन

शहरामध्ये जेथे। अनेकानेक व्यवधाने।

लक्ष विचलित होते। विनाकारण॥१॥

अपरात्री सुरु राहते। हॉटेल आणि दुकाने।

मॉर्निंग शो पहाटे। मल्टीप्लेक्सी॥२॥

झगझगीत सुरक्षित। रस्ते आणि वाहतूक।

ये-जा चाले सतत। कशासाठी॥३॥

बस रेल्वे विमान। बाईक मोठी लहान।

कार असेल तर छान। सोय होई॥४॥

व्याप कशासाठी। लोक कशासाठी।

धाप कशासाठी। लावून घ्यावी॥५॥

स्वतःसाठी काही। वेळ काढला नाही।

चिंता सदा राही। भविष्याची॥६॥

शांत चित्ती बसावे। वाचन चिंतन करावे।

क्षण अनुभवावे। चार दोन॥७॥

तंत्रज्ञान प्रगती। सुखसोयी अवती भवती।

खरेच का हे करती। आयुष्य सोपे॥८॥

प्रश्न विचारी स्वतःला। उत्तर मिळे तयाला।

तेव्हा कुठे जगण्याला। आकार येई॥९॥