വാക്കുകൾ തിരികെ വന്ന ദിവസം

കുറെ നാളായി ഞാൻ എന്തേലും എഴുതിയിട്ട്. നിർത്തിയെന്ന് പറയാനും പറ്റില്ല, തുടരാൻ ശ്രമിച്ചതായും ഓർമ്മയില്ല.
ജീവിതം മുന്നോട്ട് പോയി,
ഞാൻ അതിനൊപ്പം
നിശ്ശബ്ദമായി നടന്നു.
ചില വാക്കുകൾ
മനസ്സിൽ ജനിച്ചു,
പക്ഷേ അത് ഞാൻ മനഃപൂർവ്വം മറന്നു.
ഞാൻ എഴുതുമെന്ന് അറിയുന്ന ചില സുഹൃത്തുക്കൾ ചോദിച്ചു നീ എന്താ ഇപ്പോ എഴുതാതെന്ന്. ഉത്തരം ഒരു ചിരിയിൽ ഒതുക്കി.ഞാൻ എന്നോട് ചോദിച്ചിട്ടുമില്ല... കാരണം അതിനൊരു ഉത്തരം ഉണ്ടാവില്ല.
ഉത്തരമില്ലാത്ത ചില ചോദ്യങ്ങളായിരുന്നു എന്റെ മനസ്സിൽ ഉണ്ടായിരുന്നത്.
ഇന്ന്,
ഒരു പ്രത്യേക കാരണവുമില്ലാതെ
ഞാൻ വീണ്ടും എഴുതി.
ദുഃഖം കൊണ്ടല്ല,
സന്തോഷം കൊണ്ടുമല്ല…
ഒരു ഓർമ്മ പോലെ എഴുത്ത് എന്നിലേയ്ക്ക് തിരിച്ചു വന്നു.
ഇത് ഒരു തിരിച്ചുവരവാണോ എന്ന് എനിക്ക് അറിയില്ല.
എന്നാൽ ഇത്തവണ ഞാൻ എഴുത്തിനെ വിടാൻ ആഗ്രഹിക്കുന്നില്ല.

                           ആമി....