ನೋವ ನಗುವೊಳಗೊಬ್ಬ ಮೌನಿ!

ಮೌನಿಯಾಗಿದ್ದೇನೆ

ಮತ್ತೆ ಮೌನಿಯಾಗಿದ್ದೇನೆ

ನದಿಯ ತೆರೆಗಳ ಮೇಲೆ

ದೋಣಿಗೆ ಹುಟ್ಟು ಹಾಕುತ್ತಿದ್ದವ,

ಸಾಗರದ ಅಲೆಗಳ ಆರ್ಭಟದ

ನೋವಿಗೆ ಶರಣಾಗಿ

ಹುಟ್ಟು ತಪ್ಪಿದಂಬಿಗನಾಗಿ

ಮೌನಿಯಾಗಿದ್ದೇನೆ

ಮತ್ತೆ ಮೌನಿಯಾಗಿದ್ದೇನೆ!

ಹುಟ್ಟು ತಪ್ಪಿದ ದೋಣಿ

ಬಳಲಿದ ಕೈಕಾಲು ನಡುಗಿದೆ

ಹರಿವ ನೆತ್ತರೂ ತವಕದಲಿ

ಬಿಳಿಯಾಗಿದೆ, ಬೆವರಿದೆ,

ಬೆವರ ಕಂಡು ನಾ

ಮೌನಿಯಾಗಿದ್ದೇನೆ

ಮತ್ತೆ ಮೌನಿಯಾಗಿದ್ದೇನೆ!

ಮನದಿ ಕುದಿವ ನೋವಿದೆ,

ಅಲೆಗಳನೂ ಮೀರಿ ನಿಂತಿದೆ

ಮೀರಿ ನಿಂತೇನೂ ಆರ್ಭಟಕೆ

ಆದರೇನು ಬಲಹೀನ

ತೋಳ ಮಾಂಸ ಮುದುಡಿದೆ

ಚರ್ಮಕ್ಕಂಟಿದ ಎಲುಬುಗಳ

ಕಂಡು ಮೌನಿ ನಾನು

ಆ ನೋವ ನಗುವೊಳಗೂ

ಮೌನಿ, ಮತ್ತೆ ಮೌನಿ!